E siman aki Ombudsman di Aruba, Sra. mr. Jurima Bryson, lo ta anfitrion di e encuentro anual di e Ombudsmannen di Reino caminda e Obudsmannen ta reuni pa dialoga tocante e desaroyonan mas importante pa Reino y relevante pa e trabou di e Ombudsman, e Defensor di Pueblo. Esaki lo ta prome biaha cu Sra. mr. Jurima Bryson lo participa den e encuentro aki.

Dia 1 di october 2024, Sra. mr. Jurima Bryson a huramenta como e prome Ombudsman di Aruba. E funcion nobo di Ombudsman, tambe yama Defensor di Pueblo, ta un instancia independiente y imparcial cu lo atende cu kehonan riba funcionamento di casi tur organisacion, departamento y/of fundacion gubernamental y estatal.

Den un reunion publico di dia 8 di juli 2024, Parlamento di Aruba a dicidi di nombra mr. Jurima A.R. Bryson pa asumi e puesto menciona di Defensor di Pueblo di Aruba, esta Ombudsman, conforme esaki e ta ser huramenta na parlamento prome cu e lo asumi su funcion.

E tempo ey Ombudsman Bryson a sigura cu e palabranan di pabien no ta solamente dirigi riba su persona, sino tambe na e pueblo di Aruba cu despues di tanto aña a logra pa esaki por bira un realidad.

El a remarca cu e trabounan ta bay cuminsa y cu nan lo haci e tarea necesario pa institui e behoorlijkheidsnormen, e reglanan pa nombra Kinderombudsman, pa tuma personal, pa haci tur cos posibel pa e instituto por cuminsa cana.

Pa por nombra un Kinderombudsman, Bryson a sigura cu e ley ta prescribi cu nan ta haci un nominacion y e ora ey Parlamento di Aruba lo bay nombr’e igualmente a sucede cu Bryson.

El a informa e tempo ey cu e instituto di Ombudsman ainda no por cuminsa tuma keho y e motibo di esey ta debi cu esaki no ta trata di un continuacion di un instituto cu tabata existi. Esey ta nifica cu nan ta cuminsando for di cero

E encuentro anual di e Ombudsmannen di Reino di e aña aki tambe tin como meta pa cera conoci cu e Ombudsman nobo di Aruba. E ombudsmannen lo comparti nan conocemento y experticio cu e Ombudsman nobo.

E proposito di e intercambio aki ta pa duna apoyo na e Ombudsman nobo pa por establece e oficina nobo na Aruba. E apoyo aki ta esencial pa e Ombudsman di Aruba cu ta responsabel pa crea e Institucion di Ombudsman. Esaki ta e prome paso y uno importante pa despues e trabou operacional (trato di keho) di e Ombudsman por cuminsa.

Durante e encuentro anual cual e aña aki e lo tuma lugar riba dialuna 13, diamars 14 y diaranson 15 di januari 2025, ademas di e momentonan cu e Ombudsmannen di Reino ta reuni, tambe tin riba programa bishita oficial cerca minister di Finanzas y Cultura, Gobernador di Aruba, y un bishita y charla pa publico na Universidad di Aruba cual ta tuma luga awe nochi.

Aruba ta e ultimo pais den Reino cu a nombra un Ombudsman y esaki definitivamente ta un

stap importante. Cu e logro aki e representacion di Ombudsmannen den Reino ta completo.

E proceso pa yega na un Ombudsman no tabata uno facil. E iniciativa a cuminsa cu e vision di ex parlamentario di partido MEP Zulay van Poppel desde aña 2004/2005. Hunto cu ex parlamentarionan Kenneth Jong y Seferino ‘Sa’ Bislik, a presenta e prome concepto di ley na Parlamento pero esaki no a keda completa despues cu nan a sali di Parlamento y pa 8 aña no a mishi mas cu e dossier di Ombudsman.

 

Despues na 2009, e tempo ey como parlamentario den oposicion Evelyn Wever-Croes a tuma e dossier y na 2010 Fraccion di MEP a entrega un concepto di ley nobo basa riba esun di ex coleganan y miembronan di Parlamento pa Partido MEP.

 

Na aña 2020 e ley di Ombudsman a keda aproba y na 2023 a bin e cambio di Constitucion pa por hancra e ley di Ombudsman den Constitucion, pero e momento ey oposicion den Parlamento di Aruba a vota contra e cambio di constitucion y gobierno mester a bay back y bin cu cambionan di tur loke kier a hancra den Constitucion y hink’e den mesun ley ey, pa e por drenta den efecto.

 

Despues di e nombramento di Sra. mr. Jurima Bryson como Ombudsman, hopi ta cuestiona si e Ombudsman no lo ser mira como e ‘mucha manda’ di gobierno. E funcion ta exigi hustamente cu e persona aki na tantisimo momento y ocasion mester enfrenta gobierno, cualkier cu ta ocupa e posicion ey. Y ainda falta pa yega na e parti di ehecucion di e trabao mes di e Ombudsman, y e Ombudsman pa Menor. Si awor caba ta reina e mentalidad di ‘esey ta nos ombudsman, ta nos a pone ey’, anto esey no ta yuda pa nada pa crea un ambiente positivo pa e Ombudsman haci su trabao.

 

Mester enfatisa e obhetivo di crea un ‘protector di pueblo’ cu ta purba logra cu e ciudadano, cu ta haya su mes den problema cu gobernacion, y cu den esey no ta haya e trato riba cual e tin derecho, o no ta logra haya e respuesta cu e tabata desea o mester di gobernacion. Con ta bay crea un ambiente positivo den gobernacion pa cu e Ombudsman, si e persona ta ser trata como un persona ‘cu nos a nombra’?

 

Esaki ta un situacion cu a yega di pasa caba na otro pais unda hende den gobernacion no kier comprende cu e Ombudsman no ta solamente defende derecho di ciudadano, pero cu e obhetivo tambe ta pa mehora gobernacion mes, haciendo esaki mas beneficioso pa e ciudadania.

 

Di su banda Ombudsman Bryson a sigura cu e ta honra cu mi por ta e prome Ombudsman di Aruba y cu e ta compromete su mes pa traha cu honor y integridad pa lo cual e institucion ta para pe.