(AP) – Den lunanan di winter den nos banda di mundo, masha poco hende ta scapa di algun tipo di malesa – griep, Covid-19, norovirus. Mientras hopi di e virus cu ta causa e miseria aki ta circula rond henter aña, cientificonan ta kere cu e aumento di actividad di griep den winter por ta pasobra hende ta pasa mas tempo paden, y e aire friu ta debilita hende su defensa. A pesar cu Aruba no tin winter, nos fluho constante di bishitante ta nifica cu nos tambe ta keda mas exponi na malesa.
Asina mes, tin algun cos cu por haci pa protege bo mes for di e virusnan respiratorio y di stoma aki.
Algun sintoma ta dificil pa distingui entre malesa, specialmente cu virus respiratorio. Otro ta inconfundible.
-Norovirus ta un malesa den cuminda cu por plama a traves di awa y superficienan contamina, y por causa sacamento, diarea, nausea y dolor di stoma pa entre un pa tres dia.
-Verkoud comun por ta causa pa varios diferente tipo di virus y por pone nanishi basha, congestion, tosamento, nister, dolor di garganta, di cabes y di curpa, of kentura leve pa menos cu un siman.
-Griep, causa pa virus di influenza cu semper ta cambiando, ta conduci na kentura, calafriu, tosamento, dolor di garganta, nanishi ta basha, dolor di curpa y cabes, y sinti cansa. Sintoma di griep ta dal mas lihe cu di verkoud, y por dura entre un par di dia te dos siman.
-Covid-19 ta causa kentura, calafriu, tosamento, falta di rosea, dolor di garganta, congestion, perdida di olfato of gusto, fatiga, dolor, nausea of sacamento pa varios dia.
-RSV por causa nanishi ta core, congestion, tosamento, nister, kentura y perdida di apetito pa un of dos siman.
Un manera pa protege bo mes di tur virus: laba man!
Den serio. Labamento rigoroso y frecuente di man – cu habon! – ta crucial pa reduci e transmision di norovirus, verkoud, griep y Covid-19. Esaki ta specialmente cierto despues di usa baño y prepara of come cuminda, segun CDC di Merca. No hacie mucho lihe. Conta te 20, slow, mientras ta frega cu habon.
Si no tin acceso na awa y habon, purba un hand sanitizer cu al menos 60 porciento alcohol – maske esey no ta suficiente pa mata norovirus.
Haci superficienan limpi tambe por caba cu virus. Si norovirus a haya bo, bo lo kier haci inmediatamente limpi e superficienan cu a bin den contacto cu cuminda contamina of likido di curpa. CDC ta recomenda desinfecta cu solucion di clorox. No lubida di laba cualkier paña cu a bin den contacto cu saca of feces – usa awa cayente y detergente. Djey bolbe laba bo man atrobe.
Cu verkoud y griep, ta miho pa haci limpi regularmente e superficienan cu cual bo tin hopi contacto, manera man di porta, switch di coriente, mesa, celular, co’i hunga.
Usa productonan pa hogar cu ta contene habon of detergente y sigui cu un sanitizer.
Covid-19 generalmente ta plama mediante aire for di druppel y particula, y CDC ta bisa cu e riesgo di haya e virus di un superficie contamina ta abao.
No mishi cu bo cara
Virus por transmiti door di papia, tosa of nister, pues tapa bo boca cu un papel si bo ta sinti algo den bo garganta of nanishi. Djey bolbe laba bo man, atrobe.
Ademas, hasta si bo no a malo, considera usa tapaboca den areanan cu hopi hende pa protege bo mes di virus respiratorio.
No mishi cu bo cara: Si bo tin un virus riba bo man no laba – sea respiratorio of norovirus – y bo toca bo cara, wowo of nanishi, e por drenta bo membrana mocoso y voila! Bo ta malo!
Descansa
Otro manera pa reforsa bo defensa contra virus ta descanso. Bo sistema immuun por no traha mesun bon si bo falta drumi, tin stress of ta deshidrata. Pues no keda pusha bo mes si bo por yuda. Descansa. Drumi. Bebe awa.
Si bo ta malo, keda cas. Haci un test mesora por yuda determina si tin Covid-19 of influenza, y esey ta importante pa mira si mester un di e remedi cu por preveni malesa severo: Paxlovid pa Covid-19 y Tamiflu pa griep.
Mas cu tur cos, si bo tin sintoma, keda cas pa preveni di pega malesa na otro.
Pa trata un verkoud, griep of Covid-19, descansa y bebe likido. Por bebe remedi manera paracetamol y ibuprofen pa dolor y kentura. Humidifier por yuda cu algun sintoma tambe.
No tin remedi pa norovirus. Mester djis rehidrata lo mas posible cu awa y otro likido. Busca ayudo si bo ta deshidrata y ta nota un garganta of boca seco, no ta pishi mesun hopi of ta sinti mareo ora di lanta.
