Minister Demisionario Dangui Oduber ta contento di informa cu tin un bunita proyecto mas cu ta den tramite pa cuminsa, esta e proyecto di “Sero Colorado Memorial”.
Como parti di e maneho di turismo y tambe historia, na comienso di aña 2023 a colabora cu e comision di Aruba, Outdoor Amenities, hunto cu ministerio di Infrastructura y TPEF a sigui explora e vision pa sigui preserva y restaura nos historia. Den cuadro di esaki e proyecto pa preserva y embeyece e area di bunker riba Sero Colorado a cristalisa.
E parkeo di e area aki lo wordo restaura, embeyeci y tambe lo introduci un “Memorial Area” den cual nos localnan y turista por lesa y conoce mas di nos historia. Mas bien riba e historia di e area, cual ta e Ammo Bunker, Lighthouse y nan funcion tempo di guera.
Esaki ta un otro bunita proyecto cu tabatin varios luna caba den preparacion y e minister a bisa di ta sumamente contento di mira nan bay wordo realisa.
“Mi kier a duna un aprecio y gradicimento na nos departamento di obra publico (DOW) di pa diseña y encamina e proceso di destaho y tambe TPEF pa kere den e proyecto,” Oduber a bisa den un comunicado di gobierno.” Por ultimo e comision Aruba Outdoor Amenities pa tin e aprecio pa nos historia y cultura.”
Trabounan ta premira pa start pronto y lo dura algun luna. Corda tene na cuenta cu e area den momentonan di construccion.
