Pakico asina poco… Mucha ta nace…?

E cantidad di mucha cu ta nace na Aruba a yega na un nivel abao historico. E cifra total pa 2024 no ta conoci ainda, pero cifra pa tres cuarto di aña ta mustra cu a nace 541 mucha. Si e mesun tendencia continua, lo tin alrededor di 720 nacemento registra pa e aña. Na 2023 ainda nos a registra 856 nacemento, cu na e momento ey tambe tabata e cifra mas abao den historia reciente. E datonan publica pa Oficina Central di Estadistica (CBS) ta duna e nacementonan desde 1972, unda e aña ey mes, cu un poblacion di 58.047, un poco mas cu mitar di loke e ta actualmente, a registra 1.201 nacemento. Cu casi dos biaha e poblacion di 1972, na 2024 lo tin apenas alrededor di 60% di e cantidad di nacemento mas di 50 aña pasa. Pa ilustra e asunto un poco mas: recientemente ainda e cantidad di nacemento tabata riba 1.000 pa aña; na 2019 por ehemplo a registra 1.184, pa despues e cifra keda baha rapidamente te na e situacion di 2024 (720), mas di 450 menos cu na 2019.

Kico ta pasando realmente na nos pais? Kico ta e causa cu den e ultimo añanan aki tabatin un caida asina dramatico den nacemento? Nos no ta dedica atencion na e aspectonan tecnico di demografia, sino lo prefera di explora e situacion socio-economico cu tin un papel importante den e fenomeno aki. Esey pa un motibo obvio tambe: Aruba no ta dispone di capacidad investigativo pa un fenomeno asina. Nos ta comprende cu un institucion manera CBS ta logra cubri e trabao basico di estadistica cu nan tin, pero probablemente lo pasa hopi tempo promer cu nos mira algo mas concreto encuanto e procesonan den nos comunidad cu a conduci na esaki. Pero, esey no ta implica cu nos no tin nada pa siquiera indica unda lo mester busca e factornan cu ta contribui na e situacion, unda aparentemente un parti sustancial di pareha den edad pa forma un famia cu yiu, ta desisti, sea temporal o definitivamente, di haya yiu.

Un di e factornan cu nos ta considera di mayor peso ta e escasez di vivienda, specificamente vivienda pa famia cu yiu. Mientras e poblacion a crece considerablemente, e actividad di construccion di vivienda a baha, sigur compara por ehemplo cu e epoca di fin di añanan 90 te cu promer mitar di decada di 2000. Loke a surgi na lugar di vivienda individual, ta e construccion fuerte di apartamento. Den ultimo 5 aña pa cual nos tin cifra (2019 – 2023), por mira cu e cantidad di permiso pidi pa traha cas ta hopi mas cu pa apartamento (2290 vs 397), pero na e valor di e construccion por mira cu e cantidad di apartamento individual ta casi na e nivel di e cantidad di vivienda: Afl. 670 miyon inverti den cas, mientras apartamento ta na Afl. 543 miyon. Naturalmente cu por bin awor e pregunta: kico ta e problema pa lanta yiu den un apartamento? Nos opinion ta cu e no ta un lugar apto pa un mucha crece, sigur no si ta trata di apartamento ‘den cura di hende’, cu ta forma un parti sustancial di e cantidad total di apartamento. En todo caso, nos por imagina cu e falta di un lugar adecuado pa biba cu yiu, si e persona ta pensa asina tambe, ta haci cu hopi ta opta pa no tin yiu den e situacion ey.

Claro cu esaki no ta tur. Loke ta impacta tambe ta e situacion financiero, cu por varia bastante. Lo tin pareha cu hunto ta yega na un nivel aceptable pa cubri nan gastonan regular, pero lo tin hopi cu no por alcanza pa ademas cubri e gastonan di un yiu, cu tambe ta considerable. Mayoria di hende muher den e edad cu nan ta haya yiu, ta traha. Esey ta implica cu inmediatamente despues di nan periodo liber di parto, lo mester tin un of otro forma di cuido pafor di cas, o den cas si ta trata por ehemplo di famia, pa por tuma encargo di e yiu ora nan ta traha. No tur hende ta dispone di un wela o welo cu por y ta desea di asumi cuido di un yiu. Y otro facilidad, manera un creche, ta costa bastante placa. Cu un poblacion creciente di persona no naci na Aruba, e probabilidad cu no tin famia disponible pa yuda cu cuido di mucha ta mas grandi ainda. Nos ta kere cu ta bira tempo pa cuminza pensa riba amplia y structura cuido infantil hopi mihor, di tal manera cu e cuido ta mas pagable pa e grupo grandi di menos recurso, cu sigur mester traha, tin ora hasta mas cu un trabao, pa por subsisti.

Finalmente, e pregunta mas importante: pakico no tin ningun señal for di nos politiconan, cu ta pretende di ta e principal protector y defensornan di felicidad familiar, cu nan ta consciente di e asunto aki y ta contempla cuminza haci algo? Nos por mira na e cifranan di 2024 cu nos poblacion tin un crecemento natural negativo, pasobra e cantidad di fayecimento si ta na e nivel cu nos a mira ultimo añanan. Si ta considera cu esaki no ta un problema, pasobra via inmigracion di tur manera nos tin un poblacion creciente, anto lo ta bon pa bisa comunidad esey. Ta keda si e problema cu no tin ayudo adecuado pa esnan cu si ta desea di forma un famia, pero no ta mira posibilidad di realiza esaki.