Temporada di Carnaval ta andando na Aruba y memey di tur ambiente y actividad, tambe tin controversia. E aña aki, ciudadanonan a expresa malcontento cu e pakete di PPV cu SMAC a introduci pa diferente evento.

Diahuebs anochi Stichting Maneho di Aruba su Carnaval (SMAC) a organisa un actividad carnavalesco durante cual gruponan di carnaval a trek lot pa secuencia di tur e paradanan di Carnaval 71.

Temporada di carnaval ta cla pa ranca sali y diahuebs anochi Stichting Maneho di Aruba su Carnaval (SMAC) a organisa un actividad carnavalesco durante cual gruponan di carnaval a trek lot pa secuencia di tur e paradanan di Carnaval 71. Awe ta cende e mecha di Carnaval 71 cu Parada di Flambeu (Fakkel Optocht) den cual ta participa un total di nuebe grupo di carnaval.

Secuencia ta lo siguiente; grupo uno TOB Carnival Group; grupo dos Los Laga Bai Carnival Group; grupo tres Champagne Carnival Group; grupo cuater Colours Carnival Group; grupo cinco Dushi Carnival Group; grupo seis Aruba Tourist Carnival Group; grupo siete OPC Carnival Group; grupo ocho Empire Carnival Group; y grupo nuebe Royal Carnival Group.

Temporada di carnaval tambe a cuminsa cu algun malcontento den comunidad pa algun cambio cu SMAC a introduci e aña aki. Un di e cambionan aki ta cu mester paga pa wak transmision di algun evento di carnaval.

Algun tempo atras, SMAC a anuncia cu e aña aki nan a crea un pakete ‘Pay Per View (PPV)’ pa ciudadanonan por tin e oportunidad di disfruta di cierto eventonan di carnaval riba television.

Te cu aworaki, Telearuba tabata transmiti tur evento di carnaval pa comunidad por disfruta di dje den comodidad di nan hogar. Pero e aña aki esaki a cambia. SMAC a introduci e pakete PPV cu ciudadanonan mester cumpra pa por disfruta di e siguiente actividadnan riba television: Eleccion di Prins y Pancho; Children and Youth Calypso & Roadmarch Contest; Eleccion di Reina Infantil y Hubenil; Eleccion di Reina Grandi y Sra. Carnaval; Festival di Tumba Infantil – Hubenil; y Festival di Tumba Aruba 53.

Antes tur e eventonan aki por a ser mira riba television a traves di Telearuba sin ningun costo. E cambio a genera reaccion di algun ciudadano den comunidad, cu a expresa nan disgusto pa e cambio aki.

Riba rednan social, algun persona a indica cu e prijs cu ta cobra pa e pakete aki ta caro, specialmente si tene na cuenta e pensionado- of instancianan di adultonan mayor, cu ta esnan cu mayoria biaha ta disfruta di e actividadnan aki via television.

Pagina oficial di SMAC a contesta e usuario aki indicando cu nan ta compronde e punto di bista di e persona, pero na mesun momento a puntra ken ta compronde pa e gastonan cu SMAC tin cu niun hende ta yuda cubri.

“Dus mester busca alternativanan pa por cubri gasto. Tur cos ta un business. Nos ta invita boso tur bin join nos den board di SMAC y haya un tiki know-how di kico e ta encera,” e stichting a subraya.

Otro usuario a menciona cu esaki tambe ta afecta tur e Arubianonan cu ta biba afo cu ta gusta disfruta di e eventonan di carnaval riba television, na cual SMAC a contesta cu mester “djis paga e PPV.”

Otro cambio cu a ser introduci pa e temporada aki ta relaciona cu e Caiso y Soca Monacrh Festival, cu ta ser organisa pa Stichting MUSICA. E ultimo cambio cu Stichting MUSICA a anuncia cu e aña aki ta cu ta dividi e Caiso y Soca Monarch, pues den temporada di carnaval ta bay tuma luga e Soca Monarch Festival y den luna di mei lo organisa e Caiso Monarch Festival.

Segun informacion, musiconan a critica e fechanan entre festivalnan y con esaki por afecta nan participacion den e festivalnan. Riba kalender di actividad di SMAC e festivalnan tabata poni pa tuma luga dia 7 y 8 di februari. Pa e musiconan esaki tabata mucho tras di otro y a vota pa cambia e fecha di e Caiso Monarch y separ’e for di e Soca Monarch.

Na mesun momento cu e cambio aki Stichting MUSICA kier duna Caiso mas forsa y su propio spotlight y no lag’e keda den e sombra di Soca durante temporada di carnaval y sgun indicacionnan e Caiso Monarch Festival lo tuma luga den luna di mei.

Esaki ta otro cambio cu comunidad di Aruba no a compronde mucho y hopi ciudadano a expresa nan disgusto indicando cu Caiso (conoci anteriormente como Calypso) ta un parti di e cultura y tradicion di Carnaval y e tipo di cambionan aki ta kibra un tradicion cu tin añas caba cu comunidad a custuma cune y cu ta disfruta di dje.