Minister di Husticia y Seguridad di Hulanda, David van Weel lo haci un bishita di trabao na e islanan Aruba, Boneiro y Corsou cuminsa 12 di januari pa 17 di januari binidero. E meta di e bishita ta pa cera conoci cu otro y fortalece e cooperacion cu varios partner hudicial y administrativo den e parti Caribense di Reino riba tereno di mantencion di ley y seguridad.
Minister van Weel lo cuminsa su bishita di trabao na Boneiro, caminda e lo topa cu Gobernador John Soliano y e Conseho Ehecutivo. Durante e bishita e lo hiba combersacionnan cu diferente servicio hudicial, entre otro Ministerio Publico BES, Koninklijke Marechaussee, Cuerpo Policial Hulanda Caribense, Cuerpo di Bombero di Hulanda Caribense y Institucion Hudicial di Hulanda Caribense. Ademas e lo papia cu representante interino di Reino Jan Helmond y lo bishita e Centro Regional di Informacion y Experticio di Hulanda Caribense (RIEC CN).
Despues di finalisa su bishita na Boneiro e mandatario lo biaha pa Aruba. E programa di su bishita na Aruba ta inclui encuentronan cu Su Excelencia Gobernador di Aruba, prome minister demisionario, Evelyn Wever-Croes y minister di Husticia y Asuntonan Social demisionario, Rocco Tjon.
Minister van Weel lo bishita tambe e representacion di Hulanda na Oranjestad y Cuerpo Policial Aruba na unda e lo combersa cu Hefe di Polis Ramon Arnhem y haci un bishita di tereno na e cuerpo.
Ademas, e agenda ta inclui tambe un bishita na e planta di incineracion di droga y e sistema di radar. E bishitanan aki ta dirigi na haya un miho comprondemento di e enfoke local pa control di droga y seguridad maritimo.
Por ultimo e mandatario lo termina su bishita di trabao na Corsou na unda e lo bishita e Team di Samenwerking di Strafrecherche y Warda di Polis. Ademas e lo papia cu e Consul General di Merca y bishita e sinagoga historico di Corsou.
