Ayera riba rednan social, un usuario a comparti un e-mail cu el a ricibi pretendiendo di ta for di ePost, advertiendo otro usuarionan cu ta trata aki di un “scam”, of un estafa.
Riba e e-mail, ta aparece cu Post Aruba NV a mand’e, pero si mira e adres di e-mail, esaki no ta klop, ya cu ta aparece como sae@uip.edu.pa. E e-mail falso ta pretende di informa e usuario cu su paki a yega, y cu e mester paga Afl. 1.88 pa sigui cu e proceso. Ta adverti cu si no haci e pago, lo manda e paki back na esun cu a mand’e. Pa haci e pago, ta pidi pa click un boton riba e e-mail.
Usuarionan mesora a comenta cu for di e Papiamento malo den cual e e-mail ta skirbi por a nota cu ta algo falso y un estafa, sinembargo, e usuario cu a post e e-mail a indica cu a hacie pa adverti tur hende, cu no tur ora lo ripara di biaha cu ta trata di un estafa.
Mientras tanto, Post Aruba NV a reacciona riba su pagina di Facebook, confirmando cu ta trata di un estafa y advertiendo usuarionan pa no cay p’e.
“Estimado cliente,” Post Aruba NV a skirbi. “Nos a tuma nota cu nos clientenan a ricibi un ‘scam email’ cu nomber di Post Aruba N.V. Nos ta pidi pa no habri e e-mail aki y delete de inmediato. En caso cu mester asistencia por semper tuma contacto cu nos na +297 528-7678.”
