Un di e partinan mas bunita pa un columnista ta ora cu haya hopi feedback positivo, pero tambe comentarionan constructivo cu nos tur por siña di dje. Siman pasa, un lector a puntra mi varios pregunta detaya over mi consumo di coriente. Esaki a inspira mi analisa mi mesun consumo den un manera hopi detaya, y haci varios experimentonan pa wak unda lo por optimalisa ainda.

Den e cuadro aki mi persona a yega na diferente conclusion valioso, cual lo comparti cu pueblo den e columna aki.

Analisis di Nacionnan Uni 2022

Prome cu nos bay den detaye tocante mi mesun observacionnan, kier nota e siguiente analisis academico hopi amplio di “Malik, Arunima et al. 2022, The Lancet Planetary Health, Volume 6, Issue 4”. Esaki tabata un estudio grandi di parti di Nacionnan Uni cu e meta pa identifica diferente cosnan cu por wordo haci pa reduci gasto di coriente.

Si nos wak e figura publica den e analisis grandi aki por nota lo siguiente:
1. Instala un fan den un camber cu airco ta e cambio mas eficiente cu un ciudadano por haci relativo na e inversion.

2. Na di dos lugar switch tur luznan cu no ta LED pa luznan LED zuinig

3. Isolacion di un espacio cu ta usa airco.

4. Si aparatonan grandi electronico manera frishider ta hopi bieu, pa cambia esakinan pa e versionnan energie-zuinig inverter.

Mi mesun observacionnan cu data di smartmeter
 Den mi caso, a analisa mi mesun data di consumo cu e SmartMeter di Elmar y di esaki a yega varios conclusion hopi valioso. Nos consumo averahe e prome siman di Januari ta 12 kWh/dia.

Na prome lugar a nota cu sin airco cendi, nos tabata gasta mas-o-menos 6 pa 7 kWh/dia! Den nos caso, esaki ta debi na e frishider bieu cu no ta inverter.
Pa visualisa miho, a calcula cu e consumo di nos aparato bieu ta mas cu 2160 kWh/aña cual ta traduci su mes na 752 florin na coriente, cual ta un suma hopi grandi.
E koelkastnan di mas nobo cu tecnologia inverter avansa ta consumi solamente 353 kWh/aña. Esaki dus ta traduci su mes den un besparing di 630 florin pa aña na coriente. Un koelkast inverter ta 1.800,-, dus e Return-on-Investment ta 35% pa aña.

Un di dos observacion bastante potente tabata cu nos tabata gasta den averahe pa ora, mas coriente anochi cu durante dia. Esaki por solamente kiermen cu nos luznan cu no tabata LED ta trek relativamente hopi. Luz LED zuinig ta un inversion relativamente chikito di 55 florin pa 8 luz.
Dus un hogar por cambia tur su luznan pa esun mas zuinig pa mas o menos 110 florin.

Estimulo di Gobierno

Diferente lector por nota cu en berdad tur e inversion aki ta costa placa up front, y hopi di esnan mas vulnerabel financieramente simplemente no tin e espacio pa haci e gastonan aki, hasta si nan tabata kier. Den e caso aki ta keda na Gobierno pa yuda esnan di menos recurso inverti di haci nan cas energiezuinig.

Di un banda por nota caba cu por ehempel Qredits Aruba tin prestamonan special cu tarifa atractivo pa negoshinan bira energiezuinig. Awo mester haci algo similar, pero pa financiamento pa pueblo y principalmente esnan cu no tin moda na e momentonan aki.

Responsabilidad di cada ciudadano

Nos a wak recientemente cu loonbelasting a baha, cual ta duna extra espacio financiero pa varios parti di Aruba su pueblo. Tambe tin plan pa hisa e reparatietoeslag pa pensionadonan y bin cu extra subsidia pa Solar Panel.

Mester nota hopi duidelijk cu en fin e ta keda e responsabilidad di cada ciudadano pa usa e extra espacio financiero cu nan ta hayando pa inversion cu ta rende den largo plaso. Un Gobierno por duna mas espacio, bin cu subsidia y te hasta financiamento atractivo pa tur cos menciona. Pero si prefera gasta e placa y su besparingen na casino, fiestanan luhoso, Carnaval of na uso di alcohol, e ora un Gobierno tampoco no por haci nada.

Mi persona tin e confiansa cu mayoria lector bon informa y relativamente bon para lo usa nan extra espacio financiero pa asina inverti den haci nan cas energie-zuinig y despues re-inverti esaki pa crea un spiraal positivo di besparing. Pa esnan di menos recurso cu simplemente no por paga e gastonan upfront, Gobierno mester bin cu stapnan activo pa tur ciudadano cu kier haci nan cas zuinig lo por haci esaki.

Pero e decision pa haci cos positivo ta keda na cada lector.