Ayera mainta un grupo di empleado di Caribbean Palm Village a tene un accion di protesta. E grupo di trahado di entre 30 pa 40 empleado cu ta afilia na Sindicato FTA a dicidi di pone trabou para pa expresa nan malcontento pa e situacion cu tin andando na nan luga di trabou.
A traves di un publicacion riba nan pagina di Facebook Sindicato FTA a splica cu ta trata di un situacion cu pa un temporada caba sindicato FTA ta negociando cu gerencia di Caribbean Palm Village varios punto importante pa e contracto colectivo (CAO) nobo cu lo mester ser firma.
Ta trata di e puntonan cu ta inclui, entre otro, aumento di salario y bonus, riba cual e gerencia di Caribbean Palm Village y FTA no ta yegando na otro pa logra soluciona e impase cu tin. A base di esaki e trahadonan cu ta afilia na e sindicato a dicidi di para nan trabou ayera mainta entre 9or y 10or di mainta.
Presdiente di Sindicato FTA Sr. Hose Figaroa a mustra cu e accion aki ta afecta tur departamento di e hotel. Ayera mainta e accion a termina pa 10or di mainta y ta spera cu despues cu e empleadonan a demostra nan malcontento y necesidad pa un CAO nobo, ta spera cu lo por yega na un solucion rapido entre gerencia di Caribbean Palm Village y FTA riba e situacion aki.
Segun e noticiero local Noticia Cla a informa, den caso cu no yega na un solucion pa e impasse aki, e trahadonan tin pensa pa escala nan accion di protesta, pero e ora esaki lo bira durante weekend ya cu esaki lo tin efecto mas grandi.
E accion di protesta di empleadonan di Caribbean Palm Village ta bira e prome pa aña 2025.
