Awe mainta pa 8:30 den corte hues lo dicta sentencia den e caso penal Quetzal. Caso Quetzal ta trata di dos sospechoso principal, Y.J.R. y E.J.D.S., cu ta ser sospecha di a haci nan mes culpabel di trafico di persona of mensensmokkel den e periodo di 10 pa 11 di december 2023.
December ultimo a tuma luga e tratamento di e caso den corte durante cual fiscal a pidi un castigo di prison incondicional di 7 aña contra e dos sospechoso Y.J.R. y E.J.D.S. Como consecuencia di e mensensmokkel riba lama, cuatro persona a bin na fayece y nan curpa sin bida a yega costa na Vader Piet.
Segun OM a informa e personanan aki tabata a bordo di un boto cu riba 10 di december 2023 a sali di Venezuela rumbo pa Aruba. Investigacion a mustra cu tabatin 13 persona abordo, entre nan un mucha muher menor di edad. Bao costa nort di Aruba un ola a lastra e boto, despues di cual esaki a bolter y e personanan a bay awa. E.J.D.S. ta ser acusa di tabata e capitan mientras Y.J.R. ta ser acusa di a organisa e mensensmokkel.
