Economia informal – hende cu ta bende producto y servicio sin tin un compania registra y sin paga impuesto – ta conta pa 19.7 porciento di GDP na Aruba. Mientras tanto, un parti substancial di e placa aki ta ser manda fuera di nos pais, y mientras cu e empresario informal ta beneficia, pueblo ta perde contribucionnan valioso na nos sistema di AZV, Svb y pensioen.
Economia informal ta actividadnan economico cu simplemente no ta cumpli cu leynan existente. Esaki ta encera entre otro no ta inscribi na Camara di Comercio, no tin permiso pa haci negoshi y no ta registra na Departamento di Impuesto. Esaki ta nifica cu esnan activo den e sector informal no tin e gastonan cu esnan cu si ta cumpli cu leynan.
Economia informal ta e suma di tur e transaccionnan cu lo mester a wordo declara, pero cu no a ser declara. Esaki por inclui pago na trahadonan cu ta parcialmente of completamente informal, benta y compra di producto- y servicionan cu no ta wordo declara, huur di apartamento, taxi pirata conoci como “transporte”, y mas.
Nos por nota trahadornan den economia informal ta tur caminda. Ademas di e sectornan tradicional, manera trahador domestico of den construccion, por nota hende cu por ehemplo ta bende cuminda of bolo riba caya of pafo di algun lugar, of por nota tambe e cantidad di persona cu ta bende producto importa di afo riba paginanan di rednan social, manera Vraag en Aanbod Aruba, cu hopi biaha no ta un negoshi legitimo.
Minister demisionario di Asunto Economico, Geoffrey Wever, aña pasa a presenta na parlamento di Aruba un plan nacional pa formalisa economia informal. El a splica cu na 2022, Profesor Doctor Friedrich Schneider hunto cu specialista local drs. Jason Lejuez a haci un investigacion di e alcance di economia informal na Aruba. E conclusionnan di e rapport aki, el a señala, tabata cu economia informal ta representa mas o menos 19.7% di e GDP di economia di Aruba.
Tin diferente problema cu ta bin cu economia informal. Si nos mira por ehemplo e persona cu ta bende cuminda sea riba caya of for di nan cas, si nan no ta registra y no tin permiso di negoshi, esaki ta nifica cu tampoco nan ta cumpli cu e rekisitonan manera un carchi berde di salud. Asina ta pone salud di nan propio clientenan den peliger, door cu no por garantisa cu e persona cu ta traha e cuminda no ta malo y lo transmiti e malesa na su clientenan. Tampoco ta controla cu e persona ta cumpli cu normanan di higiena y standard di preparacion y almacenahe di cuminda, pues e consumidor ta core un riesgo grandi pa su salud.
Y si e consumidornan aki bira malo? No tin manera pa pone e bendedor para responsable, kiermen e peso si lo ser carga pa AZV. Mientras tanto, e bendedor no ta paga belasting ni contribucionnan social, pues ta bira un suma neto di gasto so pa nos pais.
Tambe tin e fenomeno di “transporte”, cu ta referi na un taxi pirata cu haci servicio. Informacion cu a yega mesa di redaccion di Bon Dia Aruba ta indica cu e transportenan aki ta cobra alrededor di Afl. 15 pa cada buelta, y hopi biaha ta transporta cantidad di pasahero riba un solo auto. Ademas cu no ta paga impuesto riba e ganashi potencialmente halto cu ta genera transportando cantidad di pasahero varios buelta cada dia, e hecho cu e transporte aki ta ilegal ta nifica cu tampoco tin seguro adecuado pa pasahero den caso cu tin un accidente den trafico, atrobe pasando e costo di cualkier eror, accidente of negligencia na fondo di AZV.
Economia informal ta fomenta un competencia inhusto. Si un proveedor di bienes of servicio no ta paga cu belasting ni cumpli cu obligacionnan social, e por afford di cobra un prijs mas barata. Esaki ta crea un desbentaha pa e comerciante y individuonan cu si ta haci nan cosnan manera ley ta manda.
Mientras tanto, control riba e sector di economia informal ta hopi pober. A pesar cu cantidad di servicionan aki ta ser ofreci riba rednan social den bista di henter pueblo, masha poco ta tende cu Departamento di Impuesto of polis of cualkier autoridad a tuma accion contra nan pa cera nan negoshi ilegal y cobra nan e impuesto y contribucionnan cu nan debe nos pais.
Pero e bon pagadornan di impuesto si ta ser controla cada rato. Otro persona cu a acerca Bon Dia Aruba, a conta cu si su negoshi cay laat cu entrega inkomstenbelasting, e ta enfrenta diferente boet mesora. Teniendo cuenta cu pago di BBO, BAZV, etc., e comerciante por core hasta cuatro diferente multa pa a cay laat cu pago di belasting. Door cu e ta inscribi den sistema, mesora ta tuma accion contra dje. Mientras cu keto bay, e comerciante cu no ta inscribi y no ta paga nada, tampoco ta ser carga cu mas multa.
Y tampoco e consumidor ta beneficia di economia informal, pasobra manera menciona caba, no tin garantia riba seguridad y calidad di e producto y servicio. Tampoco por haci reclamo na Consumentenzaken ni otro autoridadnan den caso cu algo bay malo, y e tipo di servicio y producto aki ta haci e consumidor hopi vulnerable pa estafa.
Progreso pa combati economia informal a cuminsa cu un plan di e gobierno demisionario, pero e ta bay slow. Por ehemplo, februari ultimo, Conseho di Minister a ricibi un presentacion riba e plan nacional pa combati e economia informal di Departamento di Asuntonan Economico, Comercio y Industria cu alabes ta presidente di e Comision Combati Economia Informal. E Programa Nacional ta contene diferente accion pa combati economia informal na Aruba pa e periodo 2024- 2027. Segun gobierno a bisa e tempo aya, trabao di e comision lo sigui enfoca riba implementa e diferente accionnan y lo entrega cada aña un relato riba tur e trabao haci y lo monitor tambe e implementacion di e accionnan.
Na 2023, Minister Wever hunto cu drs. Lejuez a presenta e conclusionnan di e rapport realisa pa Profesor Doctor Schneider y drs. Lejuez. E conclusion principal ta cu e enfoke mester ta pa formalisa economia informal. Tur e negoshante- y trahadonan cu ta traha den economia informal di un banda ta contribui na economia di Aruba, pero di otro banda nan contribucion no ta e contribucion optimal y ta stroba e negoshante- y trahadonan den formalidad door di e competencia cu no ta husto.
E conclusion di e rapport tambe ta cu economia informal ta un problema social cu ta compleho cu tin diferente aspecto, diferente motibo, diferente consecuencia y diferente instancia tin di haber cu esaki. E problematica aki no tin solucionnan simpel. Loke ta rekeri ta un mescla di maneho cu ta husto y cu ta logra e metanan cu tin.
Y esaki mester cuminsa sucede cu un poco mas urgencia, pa garantisa e sostenibilidad di comercio na Aruba, y e seguridad y salud di nos ciudadanonan.
