(AP) – Den un di e casonan mas importante di era di rednan social, libertad di expresion y seguridad nacional ta choca na Corte Supremo awe den argumentonan tocante e destino di TikTok, un plataforma sumamente popular cu casi mita di e poblacion na Merca ta usa pa entretenimento y informacion.
TikTok ta bisa cu e tin plan di cera e aplicacion na Merca pa dia 19 di januari si e Corte Supremo no tuma accion of atrasa e fecha di implementacion di un ley cu tin meta di obliga TikTok su benta.
Trahando cu un deadline preta, e husticieronan tambe tin nan dilanti e peticion di president-electo Donald trump, ken a retira su sosten na un prohibicion pa duna e y su administracion nobo e tempo pa yega un “resolucion politico” y evita un decision den e caso. Te ainda no ta cla si e corte lo tuma e presidente-electo su punto di bista na cuenta.
TikTok y ByteDance basa na China, ademas di creadornan di contenido y usuarionan ta argumenta cu e ley ta un violacion dramatico di e constitucion su garantia di libertad di expresion.
“Rarabes, si acaso, corte a confronta un caso di libertad di expresion cu ta afecta asina hopi hende,” abogadonan di e usuarionan y creadornan di contenido a skirbi. Creadornan di contenido ta ansiosamente wardando un decision cu por cambia nan bida y na mesun tempo ta tirando bista riba otro plataformanan.
E caso ta representa otro ehempel unda corte ta ser pidi tuma un decision tocante un medio den cual e husticieronan a admiti cu nan tin tiki conocemento of experticio, aunke hopi biaha nan ta duna nan opinion riba problemanan cu ta restringi libertad di expresion.
E administracion di Biden, defendiendo e ley cu President Joe Biden a firma den april despues cu esaki a ricibi aprobacion amplio bipartisano den Congreso, ta argumenta cu “niun hende por seriamente nenga cu China su control di TikTok via ByteDance ta representa un menasa grave na seguridad nacional.”
Oficialnan ta bisa cu autoridadnan Chines por obliga ByteDance entrega informacion tocante TikTok su usuarionan of usa e plataforma pa plama of wanta informacion.
Sinembargo e gobierno ta admiti cu “e no tin evidencia cu China a yega di purba di haci esaki,” TikTok a argumenta na e huesnan, agregando cu limitenan riba libertad di expresion no mester ser poni ora cu nan ta bini for di miedonan cu ta basa riba riesgonan di futuro.
Den december, un panel di 3 hues di apelacion, dos di Republicano y 2 di Democrata, unanimamente a mantene e ley y a rechasa e acusacionnan di violacion na libertad di expresion.
Agregando na e tension, e corte ta tendiendo argumentonan solamente 9 dia prome cu e ley ta drenta na vigor y 10 dia prome cu e administracion nobo ta asumi su cargo.
Den idioma tipicamente mira den un campaña na luga di un carta legal, abogadonan di Trump a haci yamado na e corte pa temporalmente preveni e prohibicion di TikTok pero tampoco tuma un decision definitivo.
“President Trump so ta posee e experticio di yega na acuerdo, e mandato electoral y e deseo politico di negocia un resolucion pa sala e plataforma mientras tambe ta atende e preocupacionnan di seguridad nacional cu gobierno a expresa, preocupacionnan cu Trump mes a reconoce,” D. John Sauer, Trump su escogencia pa ta su administracion su abogado pa Corte Supremo a skirbi den un documento legal.
Trump no a tuma un posicion pa loke ta e meritonan di e caso, Sauer a skirbi, Trump su ekipo di campaña a usa TikTok pa conecta cu votadornan hoben, en especial esnan masculino, y Trump a reuni cu e CEO di TtikTok Zi Chew na Trump su club Mar-a-Lag na Palm Beach, Florida, den december. Tambe e tin 14.7 miyon siguido riba TikTok.
E husticieronan a pone un banda dos ora pa argumentonan, e sesion probablemente lo extende mas cu esey. 3 abogado di Corte Supremo cu hopi experiencia lo presenta e administracion su defensa di e ley, mientras cu Trump su miembro di administracion, Noel Francisco, lo argumenta di parti di TikTok y ByteDance. Profesor di ley Jeffrey Fisher, representando creadornan di contenido y usuarionan, lo haci su di 50 argumento di corte halto.
