Recientemente, fundacion di rescate di cacho, Snoop Doggy a publica un relato basa riba datonan di e pagina di Facbeook ‘Lost and Found Pets Aruba,” den cual a destaca un estadistica sorprendente: 30 mascota ta perde cada dia na Aruba.

Segun e fundacion, maske e aña aki tabatin menos klapchi den temporada di Aña nobo, e esfuerso di conscientisacion cu e fundacion a haci riba rednan social, borchi y flyer “no a duna e resultado desea.” Esaki pasobra ora cu nan a compara e cifranan di organisacionnan manera Amivedi di Hulanda – unda tin 18 miyon residente – “ta dificil pa ignora e falta di conscientisacion y cuido di mascota durante e dianan di fiesta.”

Segun Snoop Doggy, ta “specialmente preocupante” cu ta net e rasanan di cacho chikito ta esnan cu ta aparece mas frecuentemente riba e pagina di Lost & Found, siendo cu cacho chikito ta mas facilmente pa pone paden di cas durante temporada unda tin klapchi.

E fundacion a bisa cu e aña aki nan ta bay cambia nan enfoke pa algo mas proactivo, “cu ta educa nos muchanan con pa ta doño di mascota responsabel, sperando pa crea un comunidad di doñonan di mascota cu ta mas responsabel y cuidadoso pa e futuro.”

Administrador di pagina di Facebook “Lost & Found Pets Aruba” a reacciona riba e publicacion di fundacion Snoop Doggy, expresando decepcion pa e hecho cu a pesar di esfuersonan di conscientisacion, no a mira cu e cantidad di cacho perdi a baha.

“A pesar di tur nan esfuerso y di mi aki riba e pagina, no tabatin cambio mencionable den e cantidad di mascota perdi den e periodo di klapchi aki compara cu 2023,” e administrador a skirbi riba un post. “Ta un lastima pasobra hopi mascota no ta haya nan caminda back pa cas y ta bay termina riba caya, of pio ainda, morto.”

E administrador a indica cu lo purba di duna un resumen den proximo dianan tocante e cantidad di mascota cu a perde den temporada di cambio di aña, pero “maske mi ta dispuesto y feliz di yuda boso tur, tur dia, mi ta decepciona cu nada a cambia durante e añanan cu mi tin e pagina aki. Realmente mi tabatin speransa cu e biaha aki lo ta miho.”

Potretnan di Facebook di Foundation Snoop Doggy.