Marisol Tromp reflehando riba su trabou politico: No por logra desaroyo balansa y sostenibel si sigui laga economia y naturalesa keda competi cu otro

Si kier un economia cu ta cumpli cu sostenibilidad,mester percura cu e Minister nobo di Infrastructura ta encarga tambe cu medio ambiente y naturalesa. Asina Parlamentario saliente, drs. Marisol Tromp a bisa durante un combersacion cu Bon Dia Aruba.

E Parlamentario y lider di MAS ta bay tuma despedida di Parlamento di Aruba proximamente y cu e pausa di ocho luna na 2020 pa 2021, ta despedi tambe pa awor, di trabou publico.

“Mi a huramenta pa prome biaha como Parlamentario na 1998, cu ta nifica un carera di 27 aňa, y si mi mira atras, tabata uno cu hopi logro. E proyectonan cu mi a lansa como Minister t’ey ainda, nan efecto t’ey ainda, sea ta den ambito social of di educacion.” Un di nan ta e PEN, cu ta e Plan di Enseñansa.

Minister di Centronan Comercial ?

Un critica cu tin contra Marisol Tromp como Minister ta e construccion di centronan comercial den e area hotelero. E ta un critica cu segun e politico, no ta completamente berdad. Un Paseo Herencia por ehempel tabata un proyecto otorga pa ex Minister Tico Croes. Berdad e tambe a otorga tereno pa construccion di otro facilidad, pero otronan tabata riba terenonan propiedad cu tabata for di su control. Mas ainda, como Minister e no por a nenga un proyecto comercial cu ta cumpli cu tur rekisito.

“Si ciudadanonan bin cu proyecto y ta cumpli cu condicion, Gobierno mester aproba.” E ex Minister ta convenci cu tin hopi mas factor ta hunga un wega den e caida di actividad comercial den Caya Principal, entre otro compra online y cu tira culpa riba dje ta algo hopi simplistico. Como Minister ademas, mester traha cu ciudadanonan cu tin proyecto y ta cumpli cu e condicionnan pa por realisa esakinan. “Pero Minister di Infrastructura ta mas cu e proyectonan aki. Mi a percura pa mas proyecto di cas pa pueblo, riba riolering y otro. Tambe a traha riba tereno di medio ambiente y naturaleza, cu tambe ta hopi importante.” Tabata bou di Tromp cu Aruba a conoce su prome Plan di Ordenansa Teritorial, ROP, por ehempel.

Medio Ambiente mester ta parti di Infrastructura

Consecuentemente, e siguiente Minister encarga cu medio ambiente por ehempel, mester ta consciente cu e cartera aki no ta uno facil. E no tabata facil pa e como Minister carga e responsabilidad pa cumpli cu leynan di naturaleza y tampoco e tabata facil pa Ursell Arends a cumpli cu su mandato.

“E ta un cartera cu no ta popular, pasobra mester cuida interes cu no ta di ningun hende en particular y naturalesa mesora ta drenta den conflicto cu otro actividad economico. Cierto momento ta mira con e interesnan ta ‘bots’ cu otro. Esey a bira bisto durante e tratamento pa permiti piscamento cu harpun, unda tabata kier pa a kibra tratado y ley, sin preocupa, pasobra placa ta bal mas.”

E otro ehempel tabata e discusion riba e beach pa Embassy Suites, unda interes comercial na final toch a pisa mas cu e obligacion pa proteha naturalesa. “E ta bira un conflicto unda e parti economico ta haya prioridad. Mi a mira esaki tambe cu e problema di RWZI, Serlimar, e problema di UTV, tur ta problema cu tur Gobierno ta keda pusha dilanti y ora cu mester atende cu nan, e ta crea conflicto politico.”

Den otro palabra, interes di placa ta prevalece riba e obligacion di Pais Aruba pa cuida locual tin. “Cualkier proyecto ta afecta naturalesa. No ta cuestion cu tur proyecto ta malo, pero e pregunta semper lo mester ta con leu ta dispuesto pa sacrifica naturalesa, pasobra ta bay tin destruccion. E Minister encarga cu medio ambiente y naturalesa lo defende su parti, y esun di desaroyo y economia tambe. P’esey ami ta kere cu e decision pa separa Infrastructura for di Medio Ambiente y Naturalesa no ta bon. Mester laga e carteranan aki hunto pa por tuma un decision cu ta bon argumenta y balansa, sin mucho presion y menasa.”

Desaroyo mundial

Marisol Tromp a bolbe enfatisa cu MAS no a priminti hopi durante ultimo campaňa pa e simpel hecho cu e siguiente Gobierno tin cu traha a base di e landspakket acorda cu Hulanda. Ademas, tin un realidad di un mundo cu hopi caos y tension, cu mester anticipa cu ta bay afecta economia di Aruba. Den otro palabra, e siguiente Gobierno mester anticipa cu ta bay tin retonan nobo cu ta rekeri maneho agil y dirigi. “Na Hulanda ta papia di preparacion pa guera, por ehempel, y ta afecta kico politiconan Hulandes ta enfoca riba dje. Na Aruba, politiconan no ta papia mes di e temanan dificil aki y ta keda riba problematica local. Por lo menos, no ta papia di esakinan den media na Aruba. Y mi ta kere ta importante pa comunidad sa kico ta pasando den region, den Reino Hulandes, pasobra tur cos tin su impacto.”

Den e ultimo parti di e combersacion amplio cu Marisol Tromp lo toca e tema di media y placa y kico otro actornan ta opina riba e hecho cu informacion a bira un negoshi na Aruba, cu tur su consecuencia.