Ayera mainta mediante un comunicado di prensa Gobernador di Aruba, Su Excelencia Alfonso Boekhoudt a informa cu informador, Tisa LaSorte a presenta su relato final den cual ta conclui cu partidonan AVP y Futuro conhuntamente kier forma un coalicion.

A base di su resultadonan despues di su proceso di investigacion tocante cual opcion tin pa forma un gabinete y e reunionnan cu lidernan di partido cu a ricibi asiento durante eleccion parlamentario di dia 6 di december di ultimo, LaSorte a conclui cu e dos partido aki, Futuro y AVP ta dispuesto pa forma un coalicion y a firma un declaracion di boluntad.

Ademas e partidonan a yega tambe na un acuerdo riba dos candidato pa nombra como formador, lider di partido AVP Mike Eman y lider di partido Futuro Gerlien Croes, kendenan conhuntamente por wordo encarga cu e tarea aki.

Siman anterior lidernan di e partidonan a reuni cu informador Tisa LaSorte. Na final di reunionnan lidernan a duna comentario na miembronan di prensa tocante e proceso. Segun portal noticiero NoticiaCla a informa, na salida di su reunion, lider di Futuro Gerlien Croes a indica cu ta bay inicia combersacion cu tur partido cu a saca asiento den ultimo eleccion, y cu ta bay cuminsa cu e partido cu a ricibi mas voto, AVP.

Croes a indica cu ta bay cuminsa explora den e parti di contenido, hibando combersacion cu e partidonan “y mira con leu nos ta yega.” Croes a enfatisa cu, respetando resultado di eleccion, ta dispuesto pa sinta cu tur partido.

Segun Croes a bisa no ta posible pa un di e partidonan no ta compatible cu Futuro – indicando cu tanto MEP como AVP ta compatible. Finalmente, Croes a bisa cu e tin apertura pa e idea di nombra un vak minister den e proximo gabinete.

Lider di partido AVP, Mike Eman a bisa NoticiaCla cu segun e programa di Futuro tin hopi cos en comun cu AVP, cu tin un vision comparti entre e dos partido. AVP tambe a bisa cu e tema di aumento pa pensionado ta discutibel, cu no necesariamente mester bira e Afl. 700 cu a priminti durante campaña. Sinembargo, AVP a enfatisa cu no ta posible cu lo forma un coalicion cu hopi den pueblo ta desea, esta MEP cu AVP.

“Nos a bisa informador cu nos no ta mira e posibilidad pa traha cu MEP,” Eman a bisa e momento ey na e noticiero, ya cu e direccion den cual partido AVP kier hiba Aruba ta “completamente diferente” cu esun di MEP, y pues a bisa informador cu no ta dispuesto pa traha cu MEP den un futuro gobierno.

Di su banda, lider di MEP, Evelyn Wever-Croes a bisa cu riba e pregunta si su partido ta dispuesto pa forma un gobierno, “nos contesta tabata si.” Wever-Croes a bisa cu no lo exclui ningun partido cu a gana asiento, cu loke por asumi cu MEP no ta descarta e idea di forma gobierno cu AVP. Wever-Croes tambe a bisa cu ta mira hopi compatibilidad entre e plan di su partido y esun di Futuro.

Aworaki ya a bira conoci cu e partidonan cu lo forma coalicion ta AVP y Futuro. Awor cu informador a entrega su rapport e siguiente paso den e proceso di formacion ta e nombramento di e formadornan door di Gobernador di Aruba. A base di e Landsverordening integriteit ministers, un persona nombra pa e funcion di formador, cu su consentimento, ta ser someti prome na un investigacion di seguridad estatal y un investigacion hudicial. E peticion pa haci ambos investigacion ta ser haci door di e presidente di e Hunta di

Conseho.

Tarea di e formador ta pa negocia oficialmente e acuerdonan di coalicion, incluyendo aloca e carteranan ministerial entre e partnernan di coalicion. Tambe e ta encarga pa prepara un acuerdo di coalicion cu ta delinea e prioridadnan di gobernacion y politicanan comparti. En esencia, e formador ta forma e gobierno nobo.

Despues cu ta completa e negociacionnan, e formador ta presenta e propuesta di acuerdo di coalicion y Conseho di Minister na Gobernador.

Gobernador ta huramenta formalmente e prome minister, vice-prome minister y otro ministernan cu lo sinta den Conseho di Minister. E gobierno recien forma ta asumi su cargo y cuminsa su termino.

Despues di formacion di gobierno, e prome minister y ministernan nobo ta presenta nan acuerdo di coalicion y politica na Parlamento.

Parlamento por debati y vota riba e programa proponi di gobierno, maske den practica, acuerdonan di coalicion ta generalmente acepta si nan tin sosten di mayoria.

Mester remarca cu nunca antes tabatin dos formador. E ta posibel y por sucede di e temanan ta amplio y complica cu ta rekeri mas experticio specifico. Den caso cu Gobernador di Aruba nombra ambos lider di partido como formador di gobierno, esaki lo bira prome biaha den historia cu lo tin dos formador pa un proceso di formacion di gobierno.