Ayera 27 di december a cuminsa cu benta di klapchi oficialmente. Manera ta custumber, dia 27 marduga containernan ta sali for di Wela direccion pa e puntonan di benta rond di e isla pa reparti klapchi. Pero e aña aki loke ta hopi notabel ta cu e cantidad di container tabata significantemente menos compara cu otro añanan, y ademas e aña aki no tin pagara na benta

Segun noticiero local Noticia Cla a informa, pa 4or di marduga e poco (8) containernan cu klapchi a sali for di Wela pa reparti e klapchinan cu a yega. Segun experto di explosivo, Rubin Ponson a indica na e portal, e distribucion a cuminsa 4or di marduga y a termina pa 7or di mainta.

Ponson a splica tambe cu a scoge pa reparti e klapchinan den oranan di marduga pa motibo di e tiki trafico cu tin riba caminda y esey ta haci’e mas sigur pa e chauffeurnan cu ta transporta e containernan cu klapchi. El a indica na e noticiero cu si nan scoge pa haci e reparticion durante dia, e ta bay dura hopi mas tempo pa haci e reparticion pa motibo di e trafico pisa cu tin durante dia. El a agrega cu ademas durante dianan tin e posibilidad di encontra cu hopi hende na cierto puntonan di benta, cual por ta un risico pa seguridad.

Oficialmente benta di klapchi a cuminsa pero un aspecto hopi notabel ta cu e aña aki no tin pagara, Ponson a indica anteriormente. E aña aki e ocho container cu a bin cu klapchi a bin for di Merca, y no for di China cual ta e motibo principal pakico no tin pagara e aña aki ya cu na Merca no ta bende pagara.

E containernan cu a yega for di Merca a yega cu algun variacion di klapchi y a reparti esaki hunto cu cargamento di klapchi cu e resta di aña pasa. Segun e experto a splica na e noticiero e cantidad no ta hopi.

Ponson a remarca cu si compara e cantidad di klapchi cu e bin aña aki cu añanan anterior e ta hopi tiki mes y hasta por papia di scarsedad di klapchi na Aruba. El a señala cu pa loke ta trata pagara, tin algun cu a resta di aña pasa, masha poco, pero esakinan a ser bendi caba y en realidad pa publico no ta bay tin benta di pagara.

Ponson a splica na e portal di noticia cu e puntonan d benta di klapchi a baha tambe e aña aki. El a indica cu compara cu añanan anterior, caminda tabatin por ehempel 65 punto di benta di klapchi, e aña aki nan a ricibi inicialmente peticion pa 48 punto di benta, di cual varios a cay afo na caminda. Motibo pa esaki, el a sigui splica, ta cu na ultimo ora nan ta cambia di opinion y ta dicidi pa no bende klapchi mas, of nan ta bende otro caminda, of ta uni cu otro punto di benta pa bende klapchi hunto.

Manera ua casi a bira un tradicion Cuerpo Policial di Aruba a compaña e cargamento di klapchi ayera marduga pa e puntonan di benta, esaki principalmente pa motibo di seguridad.

“Tanto KPA como nos partnernan a prepara pa e ocasion importante aki pa asina percura un transporte sigur sin niun problema. Bou direccion di Motor Unit tur container a yega nan destino sin niun problema y bon coordina,” KPA a informa mediante un comunicado di prensa.

Na mesun momento KPA a haci un suplica na tur bendedo di klapchi pa tene nan mes na reglanan y sigui e instruccionnan di e permiso di benta di klapchi. Benta di klapchi a cuminsa ayera 27 di december y ultimo dia pa bende klapchi ta 31 di december. Durante dianan di benta di klapchi agentenan policial di KPA lo ta activo cu control di benta di klapchi.

E noticia cu e aña aki no tin pagara a causa diferente reaccion den comunidad. A traves di rednan social algun ciudadano a expresa cu nan ta contento cu e aña aki no tin pagara pasobra e ta un aspecto cu ta hopi dañino pa naturalesa y ta contamina medio ambiente.

Di otro banda tin otro ciudadanonan cu ta disgusta cu no tin pagara pasobra tiramento di pagara ta un tradicion di hopi añas cu Arubianonan tin pa bisa ayo na e aña bieu y yama bon bini na e aña nobo. Pa hopi tambe e pagara ta un simbolo pa core cu e asina yama “fuku”, caminda nan ta core cu tur e cosnan malo y ta yama bon bini na cosnan nobo y positivo.

Otro usuarionan a expresa cu nan ta contento cu no tin pagara pa e hecho cu e tabata un aspecto cu tabata perhudica e mascotanan di cas. Aworaki cu not in pagara e por ta un poco mas trankil pa e animalnan, pero toch mester keda pendiente ya cu si tin kimamento di otro tipo di klapchi durante e dianan aki.