Custumber na Aruba ta pa hogarnan decora nan cas cu luz pa temporada di fin di aña. Sinembargo, durante un recorido cu Bon Dia Aruba a haci door di diferente bario di Aruba, a mustra cu no ta hopi cas a participa den decoracion cu luz e aña aki. Asina mes, hopi negoshi, rotonde y areanan publico a deleita ciudadanonan cu un bunita despliegue di luz y color.
Segun e website Canades, Christmas Decor Ottowa, e tradicion di pone luz riba kerstboom y luz pafo di cas ta relaciona cu otro. Sinembargo, e historia tras di usa luz pa celebra e temporada festivo ta bay hopi mas atras cu e invencion di coriente. De hecho, uso di luz como decoracion ta bay back na Yule, tempo cu e pueblo Nordico tabata celebra e tradicion aki di winter.
Nan celebracion tabata inclui bebe “Yule,” e cerbes sacrificial di e dios Nordico, Odin, mientras tabata observa e palo di Yule ta kima. Tabata pensa cu cende e palo di Yule na candela tabata invoca e dios di solo su regreso, mientras alabes tabata deshaci di spirito malo. A argumenta cu tradicionnan Cristian ta construi riba e idea di e palo di Yule door di usa luz durante e dianan festivo pa representa cu Hesus ta e luz den scuridad.
Cu paso di añanan, tabata usa bela durante lunanan di winter como un manera pa tin luz y calor den cas, pero tambe pa ricibi biaheronan den areanan remoto. Tabata usa bela na cas hopi prome cu e kerstboom a yega hogar. Den tradicion Cristian, ta usa un bela pa simbolisa duna bon bini na Maria y Hose.
Asina poco poco a yega na decora cu tur sorto di luz y diferente tema di Pasco, cu hunto cu globalisacion, a incorpora diferente tradicion y storia di diferente pueblo.
Aki riba, un bista di un poco di e bunita decoracionnan cu comunidad di Aruba a comparti pa un bunita temporada di fin di aña.
