Landspakket di bon intencion… O tin algo mas…?

Den nos edicion di ayera un relato encuanto e reportahe di ehecucion di e Landspakket di Aruba, cu a enfoca riba loke gobierno di Hulanda y Aruba conhuntamente a formula como nan intencion cu e plannan y tocante su ehecucion te na e momento aki. En general por bisa cu, si logra yega na ehecuta e plannan contempla, esey lo significa un avance real den operacion eficiente di gobernacion, loke finalmente por resulta den un beneficio pa e ciudadano tambe, cu mihor servicio na tur nivel.

Sin embargo, nos no ta asina leu ainda. E set up cu mas claridad di e informe mes ta yuda señala cu gran parti di e trabao ta pa haci ainda, manera nos a comenta recientemente den un editorial anterior. E palabranan cu mas ta resalta den e informe, señalando actual estado di e plannan, ta “nog niet gestart”. Ban spera cu ehecucion desde awor por logra mas rapidez, loke lo depende grandemente di ambos gobierno. Tanto na Hulanda como Aruba lo por tin gobierno nobo, cu mester fiha pa nan mes cuanto presion nan lo pone tras di implementacion di e plannan. Nos por imagina cu e presion di parti di gobierno Hulandes lo ta fuerte, pero nos no ta convenci di Aruba, basa riba amplio experiencia di varios decada, si di nan banda lo tin pura cu ehecucion di e proyectonan. Esey lo depende tambe di e intencion di e gabinete di coalicion cu keda forma den e dia y simannan nos dilanti. Nos ta na altura di e hecho cu e potencial partner den cualkier gabinete, partido Futuro, tin un programa di partido bastante ambicioso, cu tendencia di enfasis riba colaboracion den Reino. Entre otro e declaracion publico na fabor di implementacion di un ley di Reino di supervsion, loke nos ta considera sumamente positivo, pero cu e temor cu e dos partidonan grandi, cualkier cu logra yega na acuerdo cu partido Futuro, no ta faborece esey. Esaki ta bisa tambe cu pa nan e colaboracion den e Areglo Conhunto di Reino aki no necesariamente lo conta cu colaboracion den pleno bon voluntad, sino cu loke nos a mira den e cuatro añanan nos tras, di retraso tras di retraso, semper hayando un argumento cu ta aparenta logico y creible, manera alusion na falta di suficiente capacidad legislativo, lo keda tambe e imagen di e sucesonan riba e tereno di implementacion.

Cu esey nos ta bisa anto cu nos anterior y proximogobierno lo ta di mala fe, usando retraso como argumento pa no ehecuta algo, pasobra nan no ta mira e beneficio pero ta sinti e presion Hulandes pa bay di acuerdo numa, pa despues ta wak con ta usa tempo na fabor pa no implementa? En general no, pero sigur lo tin punto riba programa unda cultura y tradicion politico por hunga un papel fastioso, cu cual kier tene cuenta pero no ta bisa nada na mesa; den practica lo busca pa canaliza asunto di tal forma cu no ta mishi cu ‘derecho sagrado’. Ehemplo? Con gobierno (di Aruba) ta bay maneha un situacion, unda como mandatario bo no lo tin tanto di bisa riba evaluacion y promocion di empleado publico? Si nos impresion ta corecto, nos ta bayendo den direccion di un sistema moderniza di evaluacion di personal, cu cual nos ta completamente di acuerdo, y pakico nos no ta mira avance cu por a tuma lugar caba? Por ehemplo, por a aboli e sistema di promocion automatico (e asina yama ‘periodiek’) cu no tin uso ni razon den e sistema nobo y no a hacie. Y pakico no? Lo bisa probablemente cu “departamento di Asunto Huridico y Legislacion tinasina hopi trabao cu tin otro prioridad”. No ta un prioridad anto, si bo ta cuminza honra bon trabao di empleado publico cu promocion, pasobra bo tinmiedo pa reaccion di empleado y sindicato? Anto bo no mester a acorda esey cu Hulanda.

Igualmente nos ta mira cu practicamente no ta papiando mas di e reforma fiscal den sentido di e simplificacion di nos mondi di diferente belasting, incluyendo aki tambe simplificacion di e sistema ridiculo di tarifa diferente di impuesto di importacion, pero ta papia solamente di e mehoracionnan den cobranza y cumplimento di e ciudadano den e sistema di impuesto. No comprende nos malo, esey riba su mes ta un trabao recomendable cu mester tuma lugar tambe. Pero no tin ni un silaba mas tocante e cosnan cu mester tuma lugar pa servicio di impuesto por traha mas eficiente, y pa e ciudadano haya e beneficio ey di un sistema menos complica.Esey ta significa tambe cu nos ta keda pega cu e maldito BBO, cu su efecto inflacionario, cu ta haci e inflacion internacional cu ta yega na nos di tur manera, mas grave ainda. Nos por comprende cu di banda di e empresarionan lo no tin tanto problema cu esey, pasobra nan simplemente ta pasa nan gastonan aumenta di e BBO pa e consumidor final, esey ta pasa semper y na tur pais. Unico problema ta, pregunta: a convence Hulanda cu nos mester keda lidia cu e tipo di impuesto aki, mientras casi henter mundo caba a pasa pa un Btw, inclusive Hulanda mes?

Kico ta e conclusion di tur esaki? Cu e problema no ta den e acuerdonan logra, sino den e problemanan di implementacion, pasobra mester tene cuenta cu ‘partnernan’ local cu no kier bandona nan beneficionan. Nos ta basta leu di tene menos cuenta cu e interes di empleado publico, y mas cu loke ta conveni pueblo…