Durante y inmediatamente despues di e ultimo eleccion parlamentario dia 6 di december, a lanta e curiosidad den nos redaccion con e poblacion di Aruba ta desaroyando, mirando e cantidad di persona cu por a vota den e eleccion menciona. Esaki principalmente pasobra cu a mira un cantidad menor di persona cu tabatin derecho di voto, compara cu e añanan anterior.
Pa duna un imagen di esaki, e resumen den Tabel 1.
E tendencia cu nos por mira den e tabel aki ta cu:
Nos ta bolbiendo na e poblacion di antes di e pandemia di Covid-19, tempo cu un grupo relativamente grandi, di persona naci na Aruba y na otro pais, a sali di nos isla.
E porcentahe di poblacion cu derecho di voto, compara cu poblacion total oficial, a keda relativamente stabil, rond di 65% di e total.
Mester tuma na cuenta cu e cifranan aki ta refleha tanto cantidad di persona naci na Aruba, como persona di nacionalidad Hulandes, no naci na Aruba. E grupo di votador ta consisti semper di persona di nacionalidad Hulandes naci na Aruba, di nacionalidad Hulandes no naci na Aruba cu derecho di voto, y persona no naci na Aruba, naturaliza Hulandes y estableci na Aruba.
E situacion aki, cu ta sugeri un situacion stabil, cu riba nan mes no ta duna preocupacion, a laga nos cu algun pregunta, entre otro: con e crecemento poblacional lo ta den e proximo decadanan, y si tin algo concreto riba e tereno aki caba?
Buscando un contesta, basa riba cifra real, nos a consulta un estudio di Oficina Central di Estadistica di Aruba, cu ta duna un proyeccion di crecemento di nos poblacion te na aña 2040. E analisis di CBS ta duna un subdivision den genero y lugar di nacemento (na Aruba o den exterior) y edad, cu proyeccion cu intervalo di 5 aña di 2020 te 2040. Pa no bira demasiado complica, nos a laga edad y genero for di e tabel siguiente (Tabel 2).
Nos por conclui, di e material disonible aki, cu e poblacion naci na Aruba ta decreciendo gradualmente y por yega na e momento cu e poblacion naci den exterior ta bira e mayoria. E tendencia aki ta debi na algun factor demografico:
Un caida fuerte den cantidad di nacemento;
Un aumento gradual di fayecimento, actualmente casi na mesun nivel cu cantidad di nacemento; por lo tanto no tin crecemento poblacional natural;
Un tendencia di hopi aña di mas salida di persona naci na Aruba, compara cu esnan cu ta bolbe nan pais. Esaki combina cu mas entrada di exterior cu salida.
P
a loke ta e influencia riba e proceso elecoral, e cantidad di votador elegible, mester tene cuenta cu esaki por ta keda mas o menos na un porcentahe stabil, a pesar cu e proporcion di hende naci na Aruba ta disminui, pa via di e factornan aki:
E cantidad di votador ta depende di e cantidad di ciudadano Hulandes, no naci na Aruba, cu derecho di voto, basa riba edad y duracion di estadia;
E cantidad di persona naturaliza Hulandes, cu derecho di voto y edad apto pa vota.
Tambe mester tuma na cuenta cu e segundo generacion di migrante naci na Aruba ta registra como ‘naci na Aruba’. Por lo tanto nos por tuma nota di un cantidad di ciudadano cu derecho di voto, cu ta mustra cierto stabilidad, pero esey no ta kita e realidad cu gradualmente Aruba lo ta birando un pais di mayoritariamente migrante.
Problema di migrante ilegal y e opcionnan disponible
E cifranan presenta den e analisis aki ta trata solamente di e personanan inscribi segun ley na Censo. Ta trata di e ciudadanonan Hulandes, naci na Aruba y esnan naci na otro pais (den Reino, p.e.), y e personan naci na otro pais, naturaliza of no naturaliza, cu estadia legal. No ta trata anto di e migrantenan no documenta, cu segun expresion gubernamental mes, por yega na 17.000 persona, solamente procedente di Venezuela. E grupo total di persona indocumenta, di tur nacionalidad, por ta na 20.000 persona actualmente.
Naturalmente e proporcion di persona no naci na Aruba por subi mas rapido cu loke ta proyecta aki den e cifranan di CBS Aruba, dependiendo di e medidadanan cu gobierno lo tuma, of no tuma, pa inclui e poblacion indocumenta aki den e Aruba oficial a traves di estadia legal.
Nos no por a averigua cual ta e factornan cu CBS a tuma na consideracion den e proyeccion aki, si den esey a tuma na cuenta tur tendencia di demanda di mercado laboral, p.e. En todo caso por rconsidera cu e crecemento poblacional, y e porcion di persona naci na Aruba, por ta bastante diferente di loke ta mustra den e proyeccionnan actual.
