Libertad di prensa o… Delincuencia den prensa…?

No ta nos custumber pa reacciona riba publicacion di otro medio, pero ora ta haci mencion di nos den sentido negativo, ta necesario pa mustra cu nos no ta acepta esaki, si ademas e no ta basa riba berdad. Den tur medio, den Bon Dia Aruba tambe, a sali e noticia cu cuatro persona activo den prensa a keda sentencia den e caso di soborno di un agente policial pa pasa informacion, cual tabata considera secreto di e cuerpo. E forma con a hacie ta indica tambe cu e tabata algo intencional, ya cu e conexion digital cu a traha pa e traspaso di informacion ta algo cu no cualkier persona por haci. E actonan cu a tuma lugar durante un cierto periodo ta claramente delictivo, tanto di banda di e agente policial como di e periodistanan involucra.

E defensa incorecto y mal pensa cu a keda publica den e medio 24ora.com ta cu no ta e personanan condena so ta pertenece na e prensa cu a haci malo, sino cu e prensa cu a cumpra material di e medionan envolvi den e delitonan, tambe ta carga responsabilidad den e asunto. Den esey, banda di varios otro, ta menciona tambe Bon Dia Aruba, como medio cu tabata o ta cumpra material di suceso di medionan involucra. E articulo concerni ta bisa textualmente: “ Pues, prome cu tilda solamente tres media, tin cu acepta cu tur prensa na Aruba ta envolvi.”

Nos reaccion: Tilda ken? Envolvi den kico? Den cumpra material periodistico? Pa cuminza, ningun hende a tilda ningun persona o medio di algo. Loke si a sucede ta cu e instancianan hudicial di e pais aki a haci nan trabao y a considera necesario actua cu ley den man contra tanto e agente policial como contra esnan na otro banda di e delitonan constata. Nos medio no a haci nada mas cu reporta obhetivamente tocante e proceso aki, sin ningun intencion di lastima o ridiculiza posicion di esnan envolvi, cu e mesun cautela cu nos ta practica den tur caso na corte cu nos ta reporta. Involucra den e delito? Lo tabata asina si nos tabata na altura di antemano cu nan tabata comete crimen pa yega na e informacion ey. Y si esey tabata asina, nos lo tabatin como prensa honorable, e deber civico di denuncia e delitonan aki na momento di haya sa di nan. Obviamente esey no tabata e caso y mescos cu henter Aruba nos a haya sa di e asunto despues cu husticia a haci su trabao y e casonan penal contra e sospechosonan envolvi a cuminza cana nan caminda. Pues compra di material no ta pone nos operacion di ningun manera ‘en tela de juicio’.

Pa pone e asunto mas cla ainda: e medio aki nunca tabata den e competencia pa logra haya informacion di suceso mas pronto posible, loke si ta te awe e fuerte di e medionan involucra, cu cual nos ta desea nan tur exito, basta nan ta cana na banda corecto di ley.Pues nunca nos a declara nada negativo tocante e esfuerzo cu nan ta haci pa por conta cu primicia riba tereno di suceso local.Nos tereno semper tabata pa tuma tempo pa informa nos mes debidamente riba diferente tereno, cu sigur no ta esun di suceso policial.

E interogante grandi aki ta: pakico no ta simplemente admiti cu soborna un agente policial no ta e caminda corecto pa yega na informacion? Por a constata cu e huez a haya cu e castigonan exigi tabata excesivo y a sentencia segun e pensamento ey, pero no tabatin ningun duda tampoco cu a comete delito, punto. Como medio di comunicacion en general no ta nos tarea pa promove metodo delincuente pa obtene informacion y nos tin regla estricto no solamente pa esey, sino en general pa informacion y material cu por ofende o lastima persona innecesariamente. Nos tin como regla cu no ta publica material fotografico, por ehemplo di accidente den trafico, cu ta expone persona di un manera innecesariamente vulnerable o penoso, pasobra nos operacion no ta basa riba sensacionalismo. Claro cu nos ta na altura cu pa hopi aña caba e busqueda di primicia sa hiba na acto absolutamente inaceptable pa por logra esey. Un caso cu nos conoce di e famia envolvi mes, ta relata di e fayecimento repentino di un persona cerca di su cas, y pa ora autoridadnan por a yega ya tabatin un reportero cu tabata exigi acceso na e fayecido, loke casi a termina den un pelea cu e famia cu no tabata desea esey. Tambe nos tin testimonio di empleado di hospital di caso unda reportero cu camara den man ta trata di penetra te den e parti di tratamento di pacient na unidad di emergencia, unda ta absolutamente prohibi pa drenta. Anto ademas e reporteronan den e casonan menciona akia bira fresco y agresivo cu hende cu no ta comparti nan pensamento cu aparentemente nan tin ‘derecho’ pasobra lo ta trata di libertad di prensa. Ningun codigo di conducta di ningun organizacion internacional di periodismo ta hustifica uso di metodo delincuente pa obtene informacion. Ora husticia ta actua contra delincuencia den prensa anto, esey ta hustifica basta nan haci nan trabao corectamente. Dia cu husticia comete e eror di viola derecho genuino di prensa cu persecucion no hustifica, nos lo ta na vanguardia di defensa di e derechonan ey. Den e caso aki nos opinion ta cu corectamente a trece tur actor den e delito, esun cu a soborna y esun cu a acepta soborno, dilanti huez, nada mas…