Manera ta conoci ciere di frontera aereo entre Aruba y Venezuela a keda extendi cu cuater luna mas. Mediante un comunicado di prensa, Gobierno demisionario di Aruba a confirma e informacion aki. Na mesun momento, Directie Buitenlandse Betrekkingen Aruba a anuncia cu a emiti un conseho di biahe negativo pa Venezuela.

Desde 2019 frontera entre Aruba y Venezuela ta cera, despues cu Gobierno di Venezuela a tuma decision pa cera esaki. Na mei 2023 a haci palabracionnan entre autoridadnan di Aruba y Venezuela pa apertura di frontera maritimo entre e dos pais.

Na mas di un ocasion Gobierno di Aruba a indica cu nan ta tumando tur e pasonan necesario pa prepara Aruba pa apertura di e frontera aereo cu Venezuela na un manera sigur y responsabel.

Despues di eleccion presidencial na Venezuela den luna di juli ultimo e situacion na e pais a empeora y a bira hopi preocupante. Gobierno di Aruba conhuntamente cu ministerio di Asuntonan Exterior di Hulanda a bin ta sigui e desaroyonan na e pais bisiña. Mirando e desaroyonan aki, cu ta particularmente alarmante, Directie Buitenlandse Betrekkingen Aruba a emiti codigo di alerta cora y oraño pa Venezuela.

A emiti codigo di alerta cora pa e partinan noordwest, noordoost y zuid di Venezuela, y codigo di alerta oraño pa Caracas, Isla Margarita, Los Roques, y den e centro y parti zuidoost di e pais.

Mediante un comunicado di prensa ministerio di Asuntonan Exterior di Reino Hulandes a alerta tur persona di nacionalidad Hulandes y tur persona residencia legalmente na Aruba pa no biaha pa Venezuela. Recientemente e ministerio a ricibi informacion tocante varios suceso cu ta envolve turista na Venezuela y entre esnan mas afecta ta turistanan cu ta bay bishita familiarnan.

Manera ta conoci tin un cantidad halto di Venezolano cu ta residencia na Aruba y manera ta custumber pa temporada di Pasco y fin di aña e personanan aki ta biaha pa pasa dianan di fiesta cu nan famia.

Directie Buitenlandse Betrekkingen ta conseha pa biaha pa Venezuela solamente si ta berdaderamente necesario y no ta recomenda à realisa biahe di vakantie pa e pais pa motibo di seguridad.

E ministerio ta haci peticion na personanan di nacionalidad Hulandes y/of cu ta residencia legalmente na Aruba cu tin pensa di biaha pa Venezuela of ta encontra nan mes na Venezuela caba, pa registra nan mes via e servicio di informacion.

Di e forma aki Reino Hulandes por tin un bista di e cantidad di persona cu ta na Venezuela pa asina por ta na altura di cualkier evolucion y por brinda asesoria. Den caso cu dicidi di biaha toch pa Venezuela, embahada di Reino Hulandes ta enfatisa cu den caso di un incidente no por garantisa asistencia y cu ayudo consular ta hopi limita.

Varios pais tambe emiti alerta di biaha pa Venezuela. Den caso di Merca, den luna di september e pais a reemiti un alerta di biahe nivel 4 enfatisando e peliger di biahe pa ciudadanonan Mericano cu ta biba of ta biaha pa Venezuela.

E alerta ta indica pa no biaha pa Venezuela debi na e riesgo halto di detencionnan inhusto, terorismo, secuestro, enforsamento arbitrario di leynan local, criminalidad, intrankilidad civil y infrastructura di salud malo.

Na maart 2019, e Departamento di Estado di Merca a retira tur personal diplomatico for di Embahada di Merca na Caracas y a suspende su operacionnan. Tur servicio consular, di rutina y di emergencia, a keda suspendi te proximo aviso. Gobierno di Merca no tin habilidad pa duna servicio di emergencia na ciudadanonan di Merca na Venezuela.

Ciudadanonan Mericano na Venezuela cu tabatin mester di asistencia consular mester a bandona e pais y mester a tuma contacto cu un embahada of consulado Mericano na un otro pais.

Departamento di Estado Mericano a determina cu tin riesgo halto di detencion inhusto di ciudadanonan Mericano na Venezuela. Forsanan di seguridad a detene ciudadanonan Mericano pa te cu cinco aña y e gobierno di Merca generalmente no ta ser notifica di e detencion di ciudadanonan di Merca na Venezuela of no ta haya acceso na presonan Mericano na e pais.

E pais ta pasando den un crisis na unda crimen violento, manera homicidio, atraco arma, secuestro y atraco di auto, ta comun. Accion- y manifestacionnan politico ta sucede, hopi biaha cu poco aviso. Polis y forsanan di seguridad a institui un represion brutal contra manifestacionnan anti-Maduro, incluyendo e uso di gas lagrimogeno, spuit di peper, y bala di rubber contra participantenan di e accion- y manifestacionnan aki.

Ademas gruponan terorista Colombiano ta opera den e areanan di frontera di Venezuela cu Colombia, Brazil y Guyana. Gran parti di pais ta enfrenta tambe scarsedad di gasolin, coriente, awa, remedi y suministro medico.

Otro paisnan manera Canada, Reino Uni, Irlanda, Belgica ta entre e paisnan cu ta conseha nan residentenan pa no biaha pa Venezuela.