Recientemente CBS Aruba a publica e resultadonan di e encuesta di turismo saliente pa Aruba (Outbound Tourism). Turismo saliente ta referi na actividadnan di residentenan Arubiano pafo di nan pais. CBS cu asistencia di UNTWO a desaroya e encuesta na 2018 y e ta midi e cantidad di placa cu un residente ta gasta cu proposito di haci un bishita na otro pais y durante un bishita na otro pais.
Aunke e efectonan directo di bishitanan saliente no tin un impacto relevante riba e economia di Aruba, e ta un componente di estadisticanan di turismo inclui den recomendacionnan di UNWTO (Organisacion Mundial di Turismo) y indicadornan di e cuenta satelital di turismo (TSA) cu ta compila pa CBS.
E prome periodo di encuesta a tuma luga den october di 2018, pero e encuesta a ser interumpi pa motibo di e pandemia di COVID-19 den maart 2020 y a reinicia den april di 2022.
CBS ta indica cu e atraso den e resultadonan di e Encuesta di Turismo Saliente por keda atribui parcialmente na e pandemia di COVID-19. Sinembargo, nan ta resalta cu e motibo principal pa e tardansa aki ta e proceso di desaroyo y ehecucion di limpiesa y procesamento di dato cu un encuesta nobo ta impone.
Mientras cu e meta final di e Encuesta di Turismo Saliente ta midi e cantidad di placa gasta pa residente afo di su pais, CBS ta subraya cu tin varios factor importante cu mester ser considera pa sigura cu e midimento ta representativo y confiabel pa e populacion total di Aruba.
E encuesta a tuma luga entre residentenan den e area caminda ta busca maleta na aeropuerto. Pasaheronan cu a yega cu nan pais di residencia ta diferente for di Aruba no mester a ser entrevista. Ademas, CBS ta agrega, personanan cu a keda mas cu 1 aña afo di e isla no ta ser considera como residente cu ta biaha pa turismo. Pa e mesun motibo aki, Arubianonan cu ta biba afo di e pais, tambe ta xclui for di e encuesta.
E encuesta tin un tamaño di muestra di 4,200 entrevista pa aña. E entrevistanan aki ta distribui igual pa luna, cu 350 entrevista pa luna segun e pais di unda nan ta bin. E distribucion mensual pa pais ta basa riba e cifranan di yegada di residente for di Departamento di Inmigracion di Aruba (IASA) di e aña anterior. E dato aki a duna CBS e informacion necesario pa distribui e cuota pa aeropuerto di yegada y asina por a logra un representacion corecto di e universo di residente cu ta biaha afo di pais y nan destinacionnan.
E Encuesta di Turismo Saliente a ser realisa di manera digital cu uso di un tablet, y asina cada entrevistador a ricibi un tablet di parti di CBS pa conduci e entrevistanan. Coleccion di dato a ser haci cada luna pa 3 encuestador. Cada encuestador digitalmente ta ricibi 117 entrevista cu mester ta completa pa luna, esaki ta conoci manera e cuota mensual.
Pa garantisa cu coleccion di dato ta completa cada luna, a nombra un encuestador adicional como reserva den caso di emergencia/problema di salud pa sigura cu e cuota mensual ta ser completa.
Den total, e encuesta tabatin 62 pregunta, sinembargo, no tur pregunta ta aplicabel pa tur residente. E cuestionario tabata dividi den tres parti: caracteristicanan di e bishitante, informacion di bishita y informacion di gasto.
CBS a indica cu algun pregunta a ser agrega durante añanan pa garantisa e calidad di e respuesta for di personanan cu ta contesta e preguntanan. Esakinan, nan a resalta, ta ahustacionnan considera necesario durante e etapa inicial di e encuesta.
Pa loke ta trata e destinacionnan mas popular CBS ta splica cu cada aña mas cu 100 mil residente (prome cu pandemia) ta biaha for di pais caminda Merca ta e destinacion principal. E di dos destinacion mas popular pa residente di Aruba ta varia entre Colombia y Corsou. Den 2022, e cantidad di residente cu a biaha for di pais ainda no tabata a logra e nivel di prome cu pandemia.
CBS ta remarca cu aunke Merca ta e destinacion mas popular, Hulanda ta e pais unda residente di Aruba ta keda e tempo mas largo. E bishitante na Hulanda tin un duracion medio di estadia significantemente mas largo compara cu otro destinacionnan principal unda residentenan di Aruba ta custuma di biaha.
Pa loke ta trata gastonan di e residentenan aki den exterior, CBS ta señala cu den 2019, un aña cu e encuesta a ser realisa pa henter e aña, residentenan di Aruba a gasta un total di 133.4 miyon dollar relaciona cu turismo saliente. No tin otro aña den e analisis aki cu e encuesta a ser realisa pa un aña completo.
CBS ta resalta cu ta dificil tambe pa compara gastonan mensual, pa motibo cu a compila dato durante diferente durante e periodo di 2018-2022. E interupcion den coleccion di dato a cuminsa cu e cierre pa motibo di e pandemia COVID-19 y a sigui un tiki mas largo pa motibo di restriccionnan relaciona cu e pandemia na e aeropuerto.
Sinembargo, CBS por compara e gastonan segun categoria. E mayoria di gasto durante e periodo ta relaciona cu ticketnan di avion, e di dos categoria mas halto di gasto ta compras sigui pa cuminda y bebida, y por ultimo estadia (hotel, AirBnB etc.)
CBS a indica cu e grupo cu mas ta gasta ta e grupo cu a biaha pa Merca. Esaki, nan ta subraya, no ta un sorpresa. Aunke tabatin un cambio continuo entre Corsou y Colombia manera e di dos destinacion principal di biahe, esaki no ta refleha den gastonan. E gastonan pa e grupo cu a bishita Colombia ta significantemente mas halto compara cu esnan cu a bishita Corsou.
