Pa hopi lector cu un poco experencia usando e hermentnan di Inteligencia Artificial (AI) di mas nobo, ya caba den hopi instancia e ta parce “magia”. Por ehempel ChatGPT cu por skirbi capitulo completo di reportahenan complica, of AI pa genera potret, animacion y awendia videonan completo den menos cu un par di minuut. Sin menciona ehempelnan di AI mas sofistica cu ya caba por haci trabao di varios aspecto di Medicina of Ley miho cu un ser humano. Anno 2024, tur esaki ta posibel caba.
E aña binidero, esta 2025 lo wak e lansamento full un ola di un generacion nobo di AI, yama “AI Agents”.
Kico ta AI Agents?
Segun Sebastian Thielke di Amazon, un AI Agent ta encera “un agente autonomo cu ta reacciona na estimulo ambiental, ta proactivo den sigui un meta, tin capacidadnan di interaccion social, y por siña y mehora continuamente.”
Awo kico esaki lo por kiermen den practica? Nos lo duna un par di ehempel ilustrativo:
Imagina bo tin un compania y bo kier haci marketing. Wel, un AI Agent lo por traha e post, lansa campaña di marketing, siña por ehempel cua ta e orario mas miho pa haci un post specifico. Tur esaki completamente automatisa, sin necesidad di intervencion humano.
Un di dos ehempel lo ta di un sistema full automatisa di Salubridad. Unda un AI Agent usando sensornan biometrico, ta bin na su mesun diagnose, ta yama ambulance si ta necesario y alerta hospital. Atrobe full automatisa, sin necesidad di un ser humano.
Den e delaster ehempel y esun mas radical pa sociedad. Nos lo por tin Agents AI cientifico. Den un analisis hopi amplio di e tema aki den un review yama “Empowering biomedical discovery with AI agents” Gao, Shanghua et al. den journal Cell. 2024, nos por wak cu nos por tin AI Agents cu por literalmente descubri medicamentonan contra malesa completamente nobo, den un laboratorio automatisa y robotico. Unda e Agent en cuestion ta diseña un molecule nobo, ta haci experimento, ta planifica tur cos y ta siña activamente di tur esaki. Full esaki riba “Autopilot” completo, 24/7, 365 dia pa aña.
E tema aki di automatisacion radical den ramo di ciencia a wordo toca door di mi persona den articulo “Ciencia riba Autopilot” di 11 di Juli 2024 den Bon Dia Aruba. Ya caba nos tin laboratorionan trahando riba medicamentonan nobo, panel solar mas eficiente, bateria electronico mas sofistica y asina nos por sigui.
E resultado spera lo ta un revolucion tecnologico cu lo pone e otro periodonan di pasado manera e revolucion agricultor y e revolucion industrial parce relativamente chikito.
Asina nos por wak cu e vision proponi un par di siman pasa di un “Paretotopian Society”, no ta un ilusion di fantasia pero un realidad binidero den un periodo cu por ta varios lector lo por experiencia pa nan mes.
