Redaccion di Bon Dia Aruba kier pidi disculpa pa no a comunica debidamente tocante un articulo den nos edicion di ayera, diahuebs 19 di december riba pagina 2. E articulo, titula “AVP ta nenga di traha cu MEP: Boluntad di e partido posiciona riba boluntad di pueblo,” tabata skirbi pa un lector di Bon Dia Aruba, y como corant a cumpli pa trece e informacion y preocupacion di e lector en cuestion dilanti.
Sinembargo, a yega na nos atencion cu e manera cu a publica e articulo a lag’e mustra comosifuera no ta un opinion di un persona priva, sino opinion di nos corant. Bon Dia Aruba ta aclaria enfaticamente cu esaki no ta e caso. E puntonan expresa den e articulo ta puramente e opinion di e persona, kende a prefera di keda anonimo, y di ningun manera ta representa e opinion di corant Bon Dia Aruba. Bon Dia Aruba ta distancia di e ponencianan di e autor, cu ta keda e unico responsable pa su comentarionan.
Alabes, Bon Dia Aruba ta pidi disculpa pa e confusion causa pa nos descuido, y pa cualkier ofensa no intencional cu e opinion en cuestion por a causa.
