Segun prome minister demisionario presupuesto complementario 2024 no ta contra LAft bieu ni contra esun nobo

Durante tratamento di e presupuesto complementario di 2024 den Parlamento di Aruba, tanto prome minister demisionario, Evelyn Wever-Croes, como minister demisionario di Finanzas, Xiomara Maduro, a remarca cu e presupuesto 2024 ta cumpli cu normanan di LAft y ta riba caminda pa yega na metanan financiero prome cu a stipula.

Minister demisionario di Asuntonan General, Inovacion, Organisacion Gubernamental, Infrastructura y Planificacion Teritorial, Evelyn Wever-Croes a splica den parlamento durante tratamento di presupuesto complementario cu presupeusto 2024 a ser trata na november y a ser aproba na tempo.

Den luna di mei a presenta e prome cambionan pa e presupuesto y durante aña tabatin mas cambio cu a ta tuma luga y p’esey parlamento ta trata e cambionan di fin di aña di e presupuesto.

Un punto importante cu e mandatario a subraya ta cu den e presupuesto tin 10 miyon florin adicional cu por ser aloca na e diferente proyectonan di otro ministerio door di e inhaalactie cu a tuma luga na DIP.

Contestando pregunta di parlamentario Mansur, tocante di e presupuesto complementario no ta contra e LAft, prome minister demisionario a splica cu e no ta contra e LAft bieu ni contra e LAft nobo. El a sigui splica cu LAft tin tres norma, un di e normanan ta cu e presupuesto mester tin un surplus di 1%, cual e presupuesto ta cumpli cune. E otro norma ta cu e debe mester yega 70% na 2031 y 50% na 2040, locual el a indica ta bay yega na dje cinco aña prome cu loke ta stipula, y di tres norma den e LAft ta e norma di gasto di perosnal cu ta bisa cu pa aña 2027 mester yega 10% di e GDP y actualmente, el a señala, esaki ta menos di 10%.

Pa loke ta trata costonan di ministerio di Asuntonan General, Inovacion, Organisacion Gubernamental, Infrastructura y Planificacion Teritorial e presupuesto complemetario ta indica cu parti di e gastonan di preparacion pa e eleccionnan adelanta a ser traspasa pa e puntonan relevante. Como cu esaki no ta suficiente, 300 mil florin a drenta riba e articulo otro gastonan di e centro di gasto otro AZIOIRO. E cobertura ta bini di e agotamento di e post di subsidio di duracion di pensioen.

Pa loke ta e transferencianan, e presupuesto ta indica cu e calculacion pa e parti di pensioen-sparingstoelage ta excesivo y lo ser ahusta cu 300 mil florin menos. E diferencia aki ta ser usa pa cubri e gastonan di preparacion di e eleccionnan.

Relaciona cu e yobidanan fuerte cu a sucede algun tempo atras loke a trece consecuencianan pa e infrastructura di careteranan, DOW a usa gastonan di emergencia necesario pa tuma medidanan pa preveni y limita daño cu ta un resultado directo y inmediato di e awacero pisa promc cu e tratamento di e di dos presupuesto complementario pa 2024.

Esaki, consecuentemente a retrasa e calculacion pa e plan di mantencion di caminda di varios aña. Esaki, e presupuesto ta indica, e calculacion pa e plan di mantencion di caretera di varios aña mester ser ahusta cu 2.530.00 florin menos y e suministro di coriente pa DOW ta ser recarga de bes en cuando. Como resultado, e presupuesto di DOW lo ser aumenta cu e mesun suma pa cubri e gastonan di emergencia ya adelanta pa infrastructura di caretera.

E presupuesto tambe ta señala cu a base di cifranan di realisacion preliminar pa 2024, e calculacion di Leaseholds di DIP ta ser ahusta cu un aumento cu di 4.5 miyon florin.

Minister demisionario di Finanzas y Cultura, Xiomara Maduro a splica den Parlamento di Aruba cu e cambionan aki y documentacion cu ta compaña a cambionan aki ta brinda parlamento un bista den cambionan di maneho y con esaki ta afecta presupuesto di pais Aruba. El indica cu e ta duna bista tambe di locual ta e resultado financiero den e aña coriente y a subraya cu e cambionan aki no ta afecta e saldo y e presupuesto ta keda den e surplus.

Minister Maduro a sigui splica cu den e segundo cambio di presupuesto ta aloca tur locual ta riba 1% di e surplus, cual ta un di e normanan di supervision financiero cu mester atene na dje. Den e cambionan aki ta aloca e extra fondo cual ta 92.5 miyon florin. Esaki ta duna un espacio di 46.5 miyon cu por bay pa reduci debe di Aruba.

E mandatario a indica cu aña aki gobierno di Aruba a paga 120 miyon floirn na debe di pais Aruba, cual ta contribui na un redcuccion di 600 miyon lforin cu a ser paga.

Parti di e surplus ta bay tambe na extra inversion dunando un suma total 69 miyon cu por bay na inversionnan necesario pa pais Aruba.

Pa loke ta e costonan di ministerio di Finanzas y Cultura, e presupuesto ta splicacu pa bienes y servicio e calculacion di e cobransanan di banco ta excesivo y mester ser ahusta cu 450 mil florin menos. E diferencia, a sigui splica, lo ser usa pa renobacion di edificio di teatro Cas di Cultura (subsidio).

E parti di subsidio di proyecto bao di Directie Cultuur lo ser aumenta cu 450 mil florin suplementa pa renobacion di e edificio di Cas di Cultura. E cobertura ta bini di e agotamento di gastonan di banco.

Pa loke ta trata recursonan, e presupuesto ta indica, relacion cu impuestonan directo, cu mirando e tendencia actual di realisacion observa, e calculacion di e recursonan aki ta subi cu 20.7 miyon florin mas.

Den e caso di impuestonan indirecto, ta sigui splica cu mirando e tendencia actual di realisacion observa, e calculacion di e recursonan aki ta subi cu 20.2 miyon florin mas.

Pa derecho-, boetnan y otro, e presupuesto ta señala cu mirando e tendencia actual di realisacion observa, e calculacion di e recursonan aki ta subi cu 2.0 miyon florin mas.

Den e caso di entradanan no-impuesto, mirando e tendencia actual di realisacion observa, e calculacion di e recursonan aki ta baha cu 1.0 miyon florin. Y pa loke ta trata otro recibonan, mirando e tendencia actual di realisacion observa, e calculacion di e recursonan aki ta subi cu 60 miyon florin.

Pa loke ta trata ministerio di Husticia y Asuntonan Social, e presupuesto ta splica cu costonan di bienes y servicio, en conexion cu e proyecto di e Landspakket “Subversion administrativo’ , ta inclui 263,500 florin. Parti di e calculacion di 123.300 florin di e item Mantencion di Edificio bao di Directie Social Zaken ta ser hala pa inversionnan na beneficio di e gastonan adicional di e renobacion di e edificio di Departamento di Asuntonan Social fase 3.

Den e caso di recursonan, entradanan no-impuesto, e presupuesto ta indica cu e fondonan ricibi caba cu ta suma 263.500 florin pa e proyecto di e Pakete Nacional “Subversion (administrativo)” ainda ta ser calcula.

Por ultimo, en conexion cu e gastonan adicional di e renobacion di e edificio di Departamento di Asuntonan Social fase 3, a agrega recursonan di 123.300 florin cu a ser transferi for di e articulo di Mantencion di Edificio bou di e Directie di Sociale Zaken.