(AP) — Hefe notorio di droga, Osiel Cardenas Guillen a keda debolbi na Mexico despues di sirbi un sentencia na Merca, y rapidamente a keda rearesta y manda na un prison di seguridad maximo pa enfrenta cargonan Mexicano.
Tabatin nerviosismo tocante e regreso di Cardenas Guillen, kende antes a lidera e Cartel di Golfo den nort oriente di Mexico prome cu el a keda aresta y extradita na Merca na 2007.
Departamento di Seguridad Nacional di Merca a confirma riba su cuentanan di rednan social dialuna cu Cardenas Guillen a keda debolbi despues di sirbi 14 aña den custodia Mericano, mayoria di su sentencia di 25 aña di prison na Merca.
E ta un ciudadano Mexicano, pues ta asumi cu el a keda deporta.
Un oficial federal Mexicano, kende no tabata autorisa pa duna su nomber, a bisa cu Cardenas Guillen inmediatamente a ser hiba den custodia na Mexico pa cargonan di droga, crimen organisa y labamento di placa. E oficial a bisa cu Cardenas Guillen tabata detenido na e prison di seguridad maximo di e pais, Altiplano, west di Ciudad de Mexico.
Investigacionnan di Seguridad Nacional Mericano a post potret di Cardenas Guillen, sin cabey, siendo escolta pa dos agente den helmet y vest, y canando riba un brug na e frontera.
E imagen ta contrasta cu e reputacion temeroso di e hefe di droga cu reputacion di violencia na Mexico.
E ex-cabesante di cartel di Golfo tabata conoci pa su brutalidad. El a crea e gang mas sangriento di asesino den historia di Mexico, conoci como los Zetas, cu rutinariamente a asesina migrante y hende inocente.
Cardenas Guillen, 57, nativo di ciudad fronteriso di Matamoros, Mexico, a move ton di cocaina y a gana miyones di dollar a traves di e cartel di Golfo, basa na e ciudadnan frontera di Reynosa y Matamoros.
