Corsou: Parlamentario Calmes ta keha contra coleganan den parlamento

(CuraçaoChronicle) – Parlamentario Rennox Calmes a entrega kehonan cerca Ministerio Publico (OM) contra 4 di su coleganan den parlamento: Charetti America-Francisca, Zita Jesus-Leito, Gwendell Merrcelina y Fergino Brownbill. Tambe el a dirigi su kehonan na henter e Parlamento di Corsou.

Calmes a acusa cu e 4 parlamentarionan, tur miembro di Comite Domestico, a comparti informacion confidencial for di un procedura di keho contra su persona cu comentarista di radio. E ta mira esaki como un kiebro di confidencialidad.

Ademas, Calmes ta acusa Zita Jesus-Leito di mal conducta durante su funcion como Minister di Trafico, Transport y Plan di espacio. E ta acusa cu el a viola deliberadamente e leynan di bon gobernacion y integridad ora el a bende tereno di Gorsiraweg na e Consulado di Merca. Tambe el a señala 3 decreto ministerial firma pa Jesus-Leito dia 30 di april 2021, poco prome cu e gabinete nobo a drenta na mando, unda a bay di un ‘lease’ pa doño.

Calmes tambe a entrega keho contra tur parlamentario pa publicacion di data personal di alrededor di 5,000 persona cu ta ricibi bijstand. E ta acusa cu esaki tabata un violacion di privacidad delibera cu motibonan politico.

Contra Mercelina specificamente, Calmes a entrega varios keho, incluyendo fraude. Dia 19 di april 2023, Mercelina a supuestamente abusa di su posicion como un parlamentario pa medio di usa protocol di servicio na e aeropuerto durante un biahe priva y posiblemente utilisando un paspoort diplomatico.

Calmes tambe ta acusa Mercelina di ta den violacion di confidencialidad parlamentario despues di dia 18 d april 2023, reuniendo cu Camara di Comercio y Curaçao Business Association (VBC). Tambe e ta acusa comportamento cu no ta etico relaciona cu Mercelina su nominacion propio pa presidente di Parlatino.

Finalmente, Calmes a critica e presidente di Parlamento Charetti America-Francisca pa falta di atende su kehonan anterior. Esaki ta inclui investigacionnan tocante HNO, e incidente di Parlatino involucrando Mercelina y e violacion di privacidad di e recipientenan di bijstand.