(AP)—Un dama acusando raperonan Jay-Z y Sean “Diddy” Combs di asalto sexual ora e tabatin 13 aña di edad na un after-party a reconoce cierto inconsistencia den su storia, mientras su abogado a bisa cu e lo sigui investiga su declaracionnan.
E dama anonimo a describi cu a hib’e for di Rochester, New York, pa New York City pa e MTV Video Music Awards na 2000 y despues e chauffeur di Combs a ofrece un lift pa un after-party, segun NBC News a reporta diabierna. El a bisa cu el a papia cu musiconan Benji Madden y su ruman homber na e fiesta, y su tabata e busk’e despues di e supuesto asalto.
Pero un repressentante di e rumannan Madden a confirma pa NBC cu nan tabata riba tour den e Midwest durante e VMAs, mientras su tata a bisa cu e no ta corda e biahe pa cas di mas cu cinco ora. E amigo di e dama cu supuestamente a hib’e na e ceremonia a fayece, NBC a reporta.
E dama a lanta caso contra Combs prome, acusando cu el a abusa di dje na e after-party, y despues a cambia e caso diadomingo pa inclui un acusacion nobo cu Jay-Z, di ken su nomber legal ta Shawn Carter, tambe tabata na e fiesta y a participa den e asalto sexual.
Jay-Z a bisa den un declaracion cu e articulo ta prueba cu Tony Buzbee, un abogado na Houston, a entrega un keho falso contra dje pa placa y fama. “E incidente aki no a pasa y asina mes el a entreg’e na corte y a afirma esaki den prensa,” el a bisa. “Husticia berdadero ta biniendo. Nos ta lucha for di victoria, no pa victoria. Esaki a caba prome cu el a cuminsa. E abogadonan no ta realisa esaki ainda, pero pronto si.”
Buzbee a conta AP den un email cu si un hende ta trece un problema cu no a existi den pasado, e ta trabao di su equipo legal pa sigui colecta hechonan y evidencia. E abogado di Jay-Z, Alex Spiro, a puntra e corte pa descarta e caso, bisando den un declaracion, “ta increible cu un abogado lo no solamente entrega un keho asina serio sin investigacion adecuado, pero lo haci’e pio por medio di keda plama e storia falso aki den prensa.”
E dama a admiti di haci “algun eror” ora el a recorda e anochi, pero a bisa cu e ta para tras di su acusacionnan. E abogado di Combs, Tery R. Geragos, a bisa den un declaracion manda pa AP via email diasabra: “Ayera, un abogado a admiti cu mas di 50 hende ta declarando falsamente di ta victima. Awe, pa segundo bes e siman aki, un cliente di Buzbee a ser gara den su mentiranan. Esaki ta e comienso di e fin di e complot aki pa haya placa.”
E litigacion ta parti di un ola di casonan di asalto sexual lanta contra Combs mientras e magnata di hip-hop ta keda den costudia na New York wardando huicio riba cargonan federal di traficacion sexual.
