(AP)—E revista Time a duna Donald Trump algo cu e nunca a duna un designado di “Person of the Year”: un control largo di e declaracionnan cu el a haci den un entrevista acompañante.
E control ta acompaña un transcripto di kico e presidente electo a conta e reporteronan di e revista. Describi como un “lesa di 12 minuut”, e cuestiona 15 declaracion separa cu Trump a haci.
Esaki tabata e segunda bes cu Trump a haya e designacion di Time; el a gana tambe na 2016, e prome aña cu el a ser eligi presidente. Redactornan di Time a bisa cu e no tabata un decision dificil compara cu e finalistanan Kamala Harris, Elon Musk, Benjamin Netanyahu y Kate Middleton.
Time a bisa diabierna cu ningun otro designado a ser controla riba nan declaracion den e periodo di casi un siglo cu e revista a skirbi anualmente tocante e figura cu tabatin e impacto mas grandi den noticia. Pero el a haci mescos pa e entrevistanan den pasado cu Joe Biden, Netanyahu y Trump.
Coreccionnan asina ta un punto resaltante pa Trump y su equipo den pasado, notablemente ora ABC News a haci esaki durante su unico debate cu Democrata Kamala Harris. No tabatin ningun contesta na un peticion pa comentario diabierna.
Den e piesa, Time a cuestiona declaracionnan cu Trump a haci tocante seguridad riba frontera, autismo y e tamaño di audiencia durante su rallynan. Ora e presidente electo a papia tocante e mandato “masivo” cu el a ricibi di votadornan, Time a enfatisa cu ex-presidente Barack Obama a gana mas voto electoral e dos biaha cu el a participa den eleccion presidencial.
E revista tambe a cuestiona Trump su declaracion cu e lo haci entrevista cu cualkier persona cu ta puntra durante campaña, si e tin tempo. E candidato a rechasa un peticion pa papia den “60 Minutes” di CBS, e revista a bisa. “Den e ultimo lunanan di su campaña, Trump a priorisa entrevistanan cu podcast en bes di media popular,” segun reporteronan Simmone Shah y Leslie Dickstein a skirbi.
