Eric Ras, ex-lider di partido Curpa ta denuncia “desigualdad” den stembiljet; Segun ley, un partido mes ta dicidi con nomber di su candidatonan ta aparece riba stembiljet

Recientemente, Eric Ras, ex-lider di partido Curpa, a haci un denuncia riba su rednan social tocante e manera con su partido a aparece riba stembiljet dia di eleccion. Sinembargo, segun ley, ta e partidonan mes ta indica con kier pa su candidatonan aparece riba stembiljet.

Riba un potret cu Ras a comparti cu su publicacion, por a mira cu tur partido su candidatonan ta aparece cu fam y nomber completo. Sinembargo, candidatonan di Curpa ta aparece cu fam y solamente inicial en bes di nomber completo. Esaki a hala atencion.

“Esaki nos ta yama desigualdad. Discriminacion. No tabatin uniformidad riba e stembiljet,” Ras a skirbi. “Tur partido politico cu a participa na eleccion tur nan nomber completo y fam. Partido Curpa so a pone inicial y fam.”

Bon Dia Aruba a tuma contacto cu Sharin Luydens, hefe di Censo, kende a indica cu no ta Censo ta dicidi con e nombernan ta aparece riba e lista, sino “ta e partido ta dicidi.”
Luydens ta enfatisa cu e partido ta dicidi con ta skirbi nomber riba e lista, y manera cu nan ta entrega esaki, asina e ta aparece despues riba e stembiljet.

A mustra tambe cu riba e documento cu e partido mes a yena, tin e opcion pa pone sea “voorletters of voornamen,” y aki e lider di partido mes a yena e inicialnan en bes di e nomber completo di cada candidato.

Tambe Sra. Luydens a indica cu Articulo 18 di kiesverordening ta cla riba e punto aki.

“De kandidaten worden met vermelding van hun naam, voorletter, datum van geboorte, alsmede woonplaats, en adres op kandidatenlijsten geplaatst in de volgorde waarin door de personen namens wie de lijst wordt ingeleverd, aan hen de voorkeur wordt gegeven. De voorletters mogen geheel of ten dele door de voornamen worden vervangen.”

Kiermen, inicial por reemplasa parcial- of completamente e nomber di e candidatonan.

Ras a splica na Bon Dia Aruba sinembargo cu e hoki unda por a yena e nombernan tabata chikito, y esey ta e motibo cu a pone inicial. Sinembargo, e punto ta keda cu Censo ta pone e nombernan riba stembiljet segun loke e partido mes a entrega – es decir, na final tabata djis un malentendido y no algo iregular cu a tuma lugar.

Na final, Lydens ta enfatisa cu Censo mester actua segun ley y esey ta e motibo na final cu lista di partido Curpa a mustra diferente. Y e hecho cu henter e proceso a cana segun ley ta stipula, ta algo di elogia. “No tin duda cu Aruba ta un pais bendiciona pa tin un proceso di eleccion transparente y cu control,” Luydens a finalisa bisando.