Recherche ta pidi pa informacion pa cu caso di drive-by shooting cu a cobra bida di Nayibe Isabel Herrera dia 18 juli 2023. Mediante un comunicado di prensa Departamento di recherche ta haci un apelacion na e persona cu a duna informacion poco tempo pasa relaciona cu e caso di drive-by shooting pa tuma contacto cu nan back.
Ta asina cu dia 18 juli 2023 pa 22:55 central di polis ta ser notifica di un drive-by shooting na altura di ex-United Dinner na Driemasterstraat. E informacion a indica cu persona femenino mester ta tira abao y no tabata reaccionando.
Na yegada di polis ta pidi ambulance cu urgencia mirando e situacion di e victima. Ambulance a yega na e sitio pero lamentablemente no por a haci nada mas pa e dama, y pa 11:55 Dr. Scholten a constata e morto di e victima Nayibe Isabel Herrera naci na Aruba dia 22 september 1991 cu 31 aña di edad.
Polis tabata atento buscando e sospechosonan di e asesinato aki, y relaciona cu esaki, na altura di Aruba Juniors tambe a topa cu un auto blanco Toyota Yaris para y cu lo ta involucra den e caso aki. A confisca e auto pa mas investigacion.
Recherche ta tras di un bon pista. Nan ta na altura cu ta trata di un grupo cu ta involucra den hortamento di auto como tambe den e tiramento y e motibo pa cu esaki, segun a informa den un comunicado di prensa.
Pa por continua cu e investigacion y duna un clausura na e caso tristo aki, Cuerpo Policial Aruba ta pidi e persona cu a duna e informacion poco tempo pasa, pa yama back y ta garantisa di keda anonimo.
Cuerpo Policial a haci un apelacion tambe na cualkier otro persona cu por a wak algo of sa algo di e caso en cuestion pa yama e tiplijn di polis: 11141. Bo ta keda anonimo.
