E proyecto di reconstruccion den area di High Rise a cuminsa dia 22 di april, y e siman aki, Departamento di Obra Publico (DOW) a informa cu e prome fase a keda cla y e caya ta habri.
Manera a informa na comienso di e trabaonan, e proyecto ta parti den 3 fase ya cu no por cera e area completamente pasobra mester tin acceso na e hotelnan.
Segun DOW a informa, e prome parti tabata e reconstruccion di e area dilanti hotel Riu Antilla. Tambe a pone drenahe nobo y ductonan di awa preto nobo bao caminda.
Na september di aña pasa, nan tambe a informa cu e di dos parti ta mesun tipo di trabaonan cu ta wordo realisa den e prome parti, pero esaki lo ta entre South Beach y e hotel Holiday Inn. E di tres parti ta encera reconstruccion di e wandelpad y trottoir entre Riu Antilla te cu Holiday Inn.
DOW a informa cu inicialmente e plan tabata pa tene destaho publico aña pasa y cuminsa e cu e trabaonan di e prome parti y caba cu esaki pa final di aña, pero nan a agrega cu esaki por a logra solamente si no tabatin retraso den e proyecto pa motibo di awasero of materialnan cu lo mester bestel di afo.
Nan a splica cu teniendo cuenta na unda e trabaonan mester tuma logra, esta e area di High Rise, materialnan cu mester bin di afo y probablemente retraso pa motibo di awasero, nan a tuma e decision di tene destaho y otorga e trabao aña pasa, pero trabaonan pa e proyecto a cuminsa e aña aki.
