Recientemente WEB Aruba N.V. a introduci un sistema nobo di cliente pa mehora y optimisa su atencion na cliente, pero pa motibo cu e sistema aki no ta optimal ainda WEB a anuncia cu pa luna di december y januari no lo desconecta e servicio di awa.
Ayera WEB Aruba N.V. a informa cu nan no lo corta e servicio di awa den lunanan di december 2024 y januari 2025. E compania a indica cu nan ta consciente cu e servicio relaciona cu introduccion di nan sistema nobo no ta optimal ainda y por lo tanto clientenan ti dificultad pa paga nan recibo di awa.
Teniendo esaki na cuenta, y ademas considerando cu ta temporada di fiesta y fin di aña y tambe cu den luna di december mayoria persona ta cobra salario mas trempan cu normal, WEB Aruba a informa cu no lo desconecta e suministro di awa. E anuncio aki ta conta specificamente pa e cuentanan di awa cu ta caduca den lunanan di december y januari.
Adicionalmente nan a indica cu nan lo no cobra tampoco boet pa clientenan cu ta paga despues di e ultimo fecha di pago.
WEB Aruba a splica cu e sistema nobo ta den fase di stabilisacion y pa e motibo aki tin algun cliente cu actualmente ta ricibi nan recibo di awa mas laat cu normal. Nan a agrega tambe cu clientenan cu tin standing order via banco ta experencia tardansa den pago di nan cuenta di awa.
Considerando tur e aspectonan aki gerencia di WEB Aruba a tuma decision pa no cobra boet ni tampoco desconecta conexion di awa di clientenan cu no a paga na tempo.
Mientras tanto WEB Aruba ta trahando pa optimalisa y stabilisa funcionamento di e sistema nobo mas liher cu ta posibel. “E teamnan ta trahando diligentemente pa atende cu cualkier retraso den servicio y pa yega na un funcionamento optimal y stabiel di e sistema. Ademas ta duna asistencia na clientenan durante oranan di atardi pa anochi na e diferente MFA,” e compania a remarca.
WEB Aruba a pidi comunidad pa keda pendiente pa e oportunidadnan na unda WEB lo ta presente den oranan di atardi/anochi pa ofrece asistencia na su clientenan.
Den luna di november WEB Aruba N.V. a anuncia nan sistema nobo cu a bin cu algun cambio importante. Cu e sistema nobo aki e acostumbrado ‘number di parcela’ cu tabata ser usa pa haci pago, ta cambia pa un ‘account number’ di 10 cifra pa tur cliente di WEB Aruba, tanto residencial y comercial.
Esaki ta e cambio mas grandi cu clientenan di WEB lo ripara di e sistema nobo di administracion di cliente, cual WEB Aruba a introduci oficialmente dia 4 di november ultimo.
Hunto cu e sistema nobo di administracion di cliente, e compania di awa a lansa e portal di WEB Care completamente modernisa. E compania a enfatisa cu introduccion di un sistema nobo di administracion di cliente tabata necesario pa motibo cu e sistema bieu no tabata cumpli mas cu exigencianan contemporaneo.
Tocante e cambio for di ‘number di parcela’ pa un ‘account number’ di 10 cifra, WEB Aruba a splica cu por reconoce e ‘account number’ nobo na su 10 cifra y na e hecho cu e no tin strepi memey manera e anteriormente usa ‘number di parcela’ tabatin.
E portal di WEB Care ta un portal cu ya tabata existi y ta duna un bista cla di e cliente su consumo di awa y su historia di pago. E portal a ser actualisa y modernisa por completo. Esaki ta nifica cu usuarionan cu ya tabata registra den e portal WEB Care mester registra di nobo, cu e mesun adres di e-mail. Usuarionan nobo por registra, yamando Call Center di WEB pa inscribi nan e-mail adres.
