Ministerio di Asunto Interno y Asunto di Reino (BZK) di Hulanda a haci un evaluacion di e ultimo eleccion pa miembronan Hulandes di Parlamento Europeo. Den esaki, a conclui cu e participacion di Aruba ta demasiado abao.
Diahuebs 6 di juni 2024 a tuma lugar eleccion pa e miembronan Hulandes den Parlamento Europeo. E eleccion a bay bon danki na e trabao di e gemeentenan, Kiesraad y e diesmiles di boluntario.
E ministerio ta evalua cada eleccion cu meta pa investiga ki mehoracion ta posible den e proceso di eleccion.
Entre otro, a dedica atencion na e accesibilidad na e eleccion di Parlamento Europeo na e islanan CAS – Corsou, Aruba y Sint Maarten. Segun e carta cu minister di BZK, J.J.M. Uitermark a manda Tweede Kamer reportando riba e asunto, como respuesta na e eleccion pa Parlamento Europeo na 2019, gabinete Hulandes a conclui cu e cantidad di Hulandes cu ta registra na Aruba, Corsou y Sint Maarten pa vota den eleccion di Parlamento Europeo ta demasiado abao.
Pa e motibo aki, e gabinete anterior a bay den combersacion cu e paisnan en cuestion tocante e accesibilidad di e eleccion pa Parlamento Europeo na e paisnan aki. A duna atencion principalmente na aumenta e cantidad di votador registra na e paisnan aki door di comunicacion adicional. Pa e eleccion di Parlamento Europeo 2024, tabatin 2,752 votador registra na e islanan menciona. Esaki ta un aumento compara cu e eleccion anterior, pero na mes momento e ta keda demasiado abao compara cu e cantidad di habitante.
Intencion ta pa laga expande e cantidad di urna di votacion na e islanan CAS pa asina baha e limitacion pa e votadornan di e paisnan aki participa den e eleccion di Parlamento Europeo. Tambe e minister ta keda den combersacion cu e paisnan autonomo den Reino Hulandes riba con por mehora mas ainda e accesibilidad.
Riba peticion di BZK, Universidad di Corsou ta haciendo un investigacion entre votadornan eligible pa eleccion di Parlamento Europeo riba e posible limitacionnan cu nan ta experimenta na momento di registra como votador of emiti nan voto. Ta spera e resultado di e encuesta aki den spring di 2025.
