Durante un conferencia di prensa ayera tardi lider di partido RED Democratico, Ricardo Croes, hunto cu miembronan di directiva di e partido y candidatonan politico, Rene Kock y Rudy Lampe, a anuncia nan retiro for di politica y como directiva di partido RED Democratico.
Croes primeramente a felicita e partidonan cu a sali exitoso den eleccion y alabes a duna danki na tur cu a sostene partido RED Democratico. El a resalta cu aunke RED a resulta e partido mas chikito den e eleccion aki, e ta duna un palabra di danki special na tur cu a sostene su persona desde inicio di su carera como politico na 2013.
El a indica cu e tabatin un experiencia grandi durante su trayectoria como politico y a remarca cu tabata un placer pa ta parlamentario di Aruba y ta un representante di e pais den exterior.
Croes a subraya cu e eleccion aki a refleha locual partido RED a trece pa dilanti varios biaha den nan ruedanan di prensa, cual ta e falta di union entre partidonan chikito. El a subraya cu e e resultado a mustra esey e biaha aki den seis restzetels cu, el a enfatisa, no ta un sistema cu ta husto. “E pueblo no a vota pa duna e partidonan grandi tur e asientonan ey, pueblo a vota duideliijk,” el a indica.
El a destaca cu RED a boga pa basta tempo pa un cambio den e sistema aki y a señala cu e partido ta conoci como e partido cu a purba uni partidonan chikito, specialmente pa evita restzetels, sin por a logra esaki. El a agrega igual cu nan, hopi partido cu a pensa cu nan ta bay back parlamento a keda afo.
Croes a remarca cu aunke nan ta e partido cu a haya menos voto den historia di RED, nan no tabata e gran perdedonan di e eleccion aki compara cu otro partidonan cu tabata sinta den parlamento cu dos of un asiento, cu a pensa cu nan ta bay pa dilanti y a resulta cu a haya niun asiento.
“Esaki mi ta kere ta un les pa hopi hende, pero e les aki ta nos tur ta bay pag’ele hunto,” el a subraya.
Croes a resalta cu e ta desea pa e gobierno cu ta bay forma ta un gobierno cu por tuma e pasonan necesario pa evita cu Aruba ta bay den decadencia, y cu ta evita cu costo di bida ta caba cu e pais aki y masacra e ciudadanonan cu ta traha duro pa cubri nan gastonan diario.
“Mita tuma mi retiro oficialmente for di politica. Tabata un gran honor pa ta candidato, miembro di partido RED Democratico, tabata un honor pa por a lidera e partido na un victoria na 2017. E ta un lastima pa realisa cu pueblo pa un of otro motibo, no a logra capta nos mensahe y cu awe e resultado ta manera cu tur conoce,” el a remarca.
El a agrega cu e spera cu despues di tuma su retiro for di politica e atakenan y molester contra su persona tambe stop.
Por ultimo el a desea tur otro politico cu tin interes general dipais Aruba na pecho exito.
Presidente di directiva di partido RED Democratico y candidato number dos riba lista, Rene Kock tambe a anuncia su retiro. El a splica cu como presidente di partido RED Democratico, mirando e resultado y e caida historico den voto pa RED ta tuma decision pa retira.
El a resalta cu e resultado a demostra cu di un manera of otro e mensahe cu partido RED Democratico a bin ta trece no a yega y pueblo a haci nan escogencia. El a agrega cu loke ta duna nan speransa ta cu por a mira den e resultado cu e dos partido grandi a bay atras den voto y e cambio tabata den epartidonan chikito y algun sorpresa a cay
El a enfatisa cu mirando cu un tercera parti di e asientonan a bin door di restzetels, esey kiermen cu tin un problema basta serio cu e ley electoral.
“No ta keda’mi nada otro como voorzitter di e partido responsabel, cu un resultado asina aki, nos tin cu asumi responsabilidad pa loke ta e cantidad di votonan cu nos a haya. P’sey mi persona Rene den nomber di full e bestuur di RED ta baha, como bestuur ta entrega e partido back na nos miembronan. Nos lo keda si den background te ora e transicion tuma luga,” Kock a indica.
El a resalta cu mirando loke e pasa y e cantidad di votonan, e caida historico di partido RED Democratico, un hende mester tuma responsabilidad y den e caso aki como directiva nan ta tuma e responsabilidad aki.
Ex minister y candidato di partido RED Democratico tambe a anuncia cu retiro for di politico. El a cuminsa na bisa cu partido RED a haci e esfuerso pa acerca partidonan ACCION21, RAIZ, MAS y LPR, nan a tuma contacto cu nan y a reuni cu e partidonan aki, cu excepcion di partido MAS, pa forma un lista combina. El a indica cu nan tabatin algun luna caba tratando di yega na un lista combina, pero na final no a logra concretisa esaki.
Lampe a remarca cu for di momento cu RED a nace na 2005 e prome eleccion nan a propone pa bin cu un lista combina pa evita cu e sistema di restzetels ta faborece e dos partido tradicional. Tur partido a nenga un lista combina y el a subraya cu si den eleccion di diabierna ultimo tabatin un lista combina awe e partidonan ey lo ta den parlamento.
“E ta bay keda un reto pa futuro, loke RED semper a boga p’e, pa bin un union, un combinacion den un lista di e forsanan no tradicional politico aki na Aruba si nos kier logra cambia e sistema aki. Lamentablemente diabierna ultimo por bisa cu loke a triunfa ta e sistema tradicional di restzetels,” el a destaca.
El a resalta cu e tin 25 aña den e lucha aki y despues di 25 aña el a logra compronde diabierna ultimo algun mensahe cu el a yega di ricibi hopi aña pasa. Pero a pesar di esaki, el a indica, el a dicidi toch pa cana cu pueblo riba e caminda di bon gobernacion, pero pueblo no kier a cana cune.
“Ora pueblo no ta cana cu bo mas riba e caminda di bon gobernacion ta un decision so ta keda, di retira di politica. Pasobra den politica bo tin cu cana cu pueblo y si pueblo bisa’bo nos no kier cana cu bo riba e caminda di bon gobernacion e ora ami tin cu saca mi conclusion y p’esey awe mi ta comunica na pueblo di Aruba cu mi ta retira di politica,” el a enfatisa.
