(AP)—Alemania y varios otro pais Europeo a bisa ayera cu nan ta suspendiendo decisionnan riba declaracionnan di asilo pa ciudadanonan Sirio pa via di e situacion no claro den nan pais materno despues di e caida di Bashar Assad.
E Oficina Federal pa Migracion y Refugiado na Alemania a bisa ayera cu mas di 47,000 aplicante actualmente ta para. El a bisa cu e lo reevalua e situacion y resumi cu decisionnan un bes cu e situacion na Siria a stabilisa.
Vocero pa e ministerio di Asunto Interior Sonja Kock a nota cu decisionnan tocante asilo ta tuma na cuenta e circunstancianan di cada caso, cual ta envolvi evaluacion di e situacion den e pais di e aplicante. El a bisa cu e autoridad di migracion tin e opcion di priorisa casonan for di otro luga si un situacion no ta claro, manera e ta actualmente na Siria.
Mas general, oficialnan Aleman a bisa cu ta demasiado trempan pa por bisa kico e caida di Assad lo nifica pa e hopi Sirionan cu a busca refugio na Alemania durante e ultimo añanan, particularmente den e añanan 2010.
Minister di Asunto Interior Nancy Faeser a bisa cu no ta posible ainda pa predici “posibilidadnan concreto pa regresa” y “e no ta serio pa specula tocante esaki den un situacion terible asina.” Su ministerio a bisa cu, desde dia 31 di october, tabatin 947,136 ciudadano Sirio den e pais, mayoria di cual tabatin un tipo di refugio of otro status di proteccion.
Na Austria, Canciyer Karl Nehammer tambe a duna su minister di Asunto Interior e tarea di suspende decisionnan riba aplicacionnan di Sirionan pa asilo, segun e agencia di prensa na Austria a reporta. “Ta importante pa establece e hechonan prome, pa pone asilo y proceduranan di reunificacion di famia riba pausa,” segun minister di Asunto den Exterior Alexander Schallenberg. “Nos mester warda te ora cu e situacion stabilisa, pa asina nos mira kico ta pasando, kico e proximo puntonan ta.”
E agencia di migracion na Suecia a bisa cu e tambe a pone un pausa riba decisionnan di casonan Sirio pa asilo, argumentando cu no ta posible presentemente pa evalua e motibonan di e aplicantenan pa proteccion. E no a specifica con largo e pausa lo dura, pero a bisa cu a haci un decision similar den conexion cu e regreso di e Taliban na Afganistan na 2021.
Na Finlandia, e director di e Departamento pa Proteccion Internacional na e Servicio di Inmigracion Finlandes, Antti Lehtinen, a conta e locutor publico YLE cu a suspende decisionnan eynan, y e no por calcula inmediatamente ki ora nan lo resumi.
