Dia 4 di december, Stichting Monumentenfonds Aruba (SMFA) a yega na un logro importante den e redestinacion di un edificio historico den curason di Oranjestad.

Hunto cu Minister demisionario di Economia, Geoffrey Wever (Futuro), representantenan di Aruba Bank, Nationaal Restauratiefonds di Hulanda (NRF) y SMFA a firma un acuerdo di intencion pa cu compra y restauracion di ex edificio di John G. Emanbank na Caya G.F. Betico Croes 41.

Durante e ceremonia di firmamento Minister di Economia Geoffrey Wever, Sra. Anne Witsenburg di SMFA, Sra. Marleen van der Borgt di Aruba Bank y meneer Coen Reinders di NRF a hiba palabra.

E bunita edificio, cu ta data di añanan trinta, y a fungi pa hopi aña como oficina di Aruba Bank. Funda pa John G. Eman como e John G. Emanbank na 1925, el a bira Aruba Bank na juli 1936. E edificio historico aki tin mas cu dies aña for di uso, pero pronto lo wordo rebiba danki na e colaboracion entre e diferente partidonan.

Colaboracion

E acuerdo di intencion ta un colaboracion entre SMFA, Ministerio di Economia , Aruba Bank y Nationaal Restauratiefonds (NRF) di Hulanda. E ta encera compra y financiamento di e restauracion y renobacion di e edificio. Banda di esaki a haci oficial e acuerdo di intencion cu Ministerio di Economia pa huur di e propiedad na varios departamento cu ta resorta bou di e Ministerio.

E plannan nobo lo inclui oficina pa Centraal Bureau Statistiek Aruba (CBS) y Sociaal Economische Raad (SER).

Ademas, lo inclui un espacio comercial​ na e piso abou pa un facilidad di horeca y un apartamento luhoso na e prome piso.

Balor historico y siguiente pasonan

E edificio tin un arkitectura unico y clasico y ta un potencial monumento cual lo por haya su proteccion di Monumentenbureau unabes e edificio bira propiedad di SMFA. Cu e acuerdo di awe ta pone e prome paso no solamente pa restaura, pero tambe pa conserva su balor historico y na mes momento dun’e un funcion nobo cu ta contribui na revitalisacion di Oranjestad.

E acuerdo di intencion ta duna NRF y SMFA 6 luna pa finalisa e buskeda di fondo pa e parti restauracion.

Despues SMFA lo continua cu e proceso necesario pa asina por cumpli cu e acuerdo pa compra y traspaso oficial di e edificio na e fundacion. E siguiente paso lo ta pa continua cu e plannan pa restauracion y asina inicia cu e proyecto oficialmente na final di 2025.

SMFA ta gradici na e diferente partnernan pa e colaboracion y spera cu pronto nos ta bek dilanti di e edificio di John G. Emanbank pa por anuncia e traspaso oficial di e edificio pa nos fundacion por preserva esaki pa futuro generacionnan.