(AP)—E legisladornan derechista y iskierdista a uni hunto diaranson den un voto di desconfiansa historico causa pa e disputanan di presupuesto cu ta forsa prome minister Michel Barnier y su miembronan di gabinete pa retira, e prome desde 1962.
E asamblea nacional a aproba e mocion cu 331 voto. Ta rekeri un minimo di 288 pa cumpli cu esaki. Presidente Emmanuel Macron a insisti cu e lo sirbi pa e resto di su termino te cu 2027. Sinembargo, e lo mester apunta un prome minister nobo pa un segunda vez despues di e eleccionnan legislativo na juli lidera pa un parlamento dividi.
Un conservativo apunta na september, Barnier ta bira e prome minister cu a sirbi pa un periodo mas cortico den e Republica moderno di Francia. “Mi por bisa bo cu e lo keda un honor pa mi pa a sirbi Francia y cu dignidad Frances,” Barnier a bisa den su ultimo discurso prome cu e voto.
“E mocion aki di desconfiansa…lo haci tur cos mas serio y mas dificil. Esey mi ta sigur di dje,” el a bisa.
Oposicion di e presupuesto proponi pa Barnier
E voto crucial di diaranson a surgi di e oposicion riba e presupuesto proponi di Barnier. E asamblea nacional, tambe conoci como e parlamento di Francia, ta fractura, cu ningun partido den posesion di un mayoria. E ta constitui di tres bloque grandi: e aliadonan centrista di Macron, e partido den coalicion New Popular Front, y e partido ultra-derechista National Rally. Ambos bloque den oposicion, tipicamente dividi, ta uniendo contra Barnier, acusando e di impone medidanan di austeridad y pa fracasa di atende na e necesidadnan di ciudadanonan.
Papiando riba television despues di e voto, lider di National Rally Marine Le Pen a bisa “nos mester a tuma un decision, y nos decision ta pa proteha Francia” for di un presupuesto “toxico.” Le Pen tambe a acusa Macron di ta “mayormente responsable pa e situacion actual,” agregando cu “e presion riba e presidente di e Republica lo bira mas y mas pisa.”
Papiando na e asamblea nacional prome cu e voto a tuma luga, legislador ultra-iskierdista Eric Coquerel a haci yamado riba e gobierno pa “stop di pretende cu e luznan lo paga,” notando e posiblidad di un ley di emergencia pa impone impuesto cuminsando 1 di januari, basa riba e reglanan di e añanan aki.
“E ley special lo preveni un ciere. E lo permiti nos pa yega pa fin di aña por medio di retrasa e presupuesto pa algun siman,” Coquerel a bisa.
Macron lo scoge un prome minister nobo
Macron mester apunta un prome minister nobo, pero e parlamento dividi ta keda mescos. No por tin eleccion legislativo te cu al menos juli otro aña, creando un posible impasse pa creadornan di politica.
Macron a bisa cu discusionnan tocante su posible retiro tabata “politica ficticio” durante un biahe pa Saudi Arabia na comienso di siman, segun media Frances ta reporta.
“Mi ta aki pasobra mi a ser eligi dos biaha pa e pueblo Frances,” Macron a bisa. Tambe a reporta cu el a bisa: “Nos no mester spanta hende cu cosnan asina. Nos tin un economia fuerte.”
Impacto riba mercadonan financiero
Mientras Francia no ta den riesgo di un ciere gubernamental manera Merca, instabilidad politico por spanta e mercadonan financiero. Francia ta bao presion di Union Europeo pa reduci su debe enorme. E deficit di e pais a ser calcula pa yega na seis porciento di GDP e aña aki y analistanan ta bisa cu e por aumenta pa shete porciento sin modificacionnan drastico. E instabilidad politico por aumenta gradonan di interes di Francia, creando mas debe ainda.
Carsten Brezeski, hefe global di macro na ING Bank, a bisa cu incertidumbre tocante e futuro gobierno di Francia y finanzas ta strobando inversion y crecemento. “E impacto di un falta di gobierno na Francia por ta negativo pa e crecemento di Francia y tambe e Eurozone,” Brzeski a bisa.
Francia a mira e costonan di fiamento den e mercado di bono aumenta, recordando memorianan di e crisis di debe na Grecia na 2010-2012. Analistanan ta bisa cu Francia ta leu di un crisis similar pasobra su debe enorme no tin un deadline pa varios aña, y pasobra su bononan ta keda den demanda debi na un deficit den bononan di e gobierno Aleman. Ademas e Banco Central Europeo por interveni pa baha e costonan di fiamento den caso di tumulto extremo den e mercado, aunke e posibilidad di esaki ta keda abao.
