E panorama politico di Aruba pa hopi tempo ta domina pa dos partido grandi categorisa como partidonan tradicional, creando un sistema cu ta laga nos como ciudadano sinti no representa y desilusiona. Desde nos Status Aparte, nos a vota tradicionalmente pa e dos partidonan grandi, cu a hiba nos na un sistema previsibel (8 aña un y 8 aña e otro) cu hopi biaha no ta satisface e necesidadnan diverso di nos poblacion.

Esaki a bira obvio den e ultimo dos eleccion, caminda cu pueblo ta sigui vota pa coalicion.

Mientras nos ta wak den futuro, ta hopi cla cu nos isla mester di un tercer partido politico cu lo crea un impacto real y cambia e panorama politico. E tempo a yega pa nos cuminsa reconsidera nos patronchi di voto, y realisa cu simplemente cambiando nos voto entre partidonan chikito no ta e solucion pa e desafio y temponan dificil cu nos ta enfrentando.

Duna sosten consistente na partidonan “chikito”

Historicamente hopi partido chikito a ricibi e oportunidad pa goberna den coalicion cu partido mas grandi. Desafortunadamente hopi nobato, pa nan inexperencia, a tuma decisionnan indesea, y pa e motibo di falta di experiencia a resulta den un gobernacion cu ta parce caotico y ineficiente.

Ora e votador (electorado) inconscientemente y consistentemente ta straf e partido “chikito prometedor” den gobernacion den e proximo eleccion, nos ta manteniendo e sistema tradicional (existente) na bida. Progreso berdadero mester di stabilidad, y e stabilidad aki por bini solamente ora ta duna sosten consistente na partidonan “chikito” cu ta dispuesto pa siña, crece, y adapta cu tempo. Dunando bo partido chikito un “second chance” ta e miho movida pa logra yega na un sistema sosteni pa tres en bes di dos partido grandi.

Tribalismo intensificando division

Un otro aspecto importante cu ta influencia nos sistema politico ta e fenomeno di “tribalismo”, un fenomeno basa ariba pensamento como un tribu. “Tribalismo” den politica ta referi na e tendencia pa pone lealtad personal na un lider of un grupo politico riba lealtad na ideologia of politica. Den un pais chikito manera Aruba, esaki por crea un ambiente unda mucho hende depende riba conocemento personal y amistad cu e politico of partido, na lugar di evaluacion obhetivo di un partido pa su capacidad pa goberna. Esaki ta resulta den un sistema cu no necesariamente ta refleha e preferencia y necesidadnan di mayoria di e poblacion.

Mientras cu “tribalismo” por crea un band estrecho di unidad den comunidad, e tin tambe consecuencianan negativo, manera limita dialogo, intensifica division, y duna preferencia pa interes di un grupo na lugar di beneficia sociedad den su totalidad. Den un ambiente “tribal”, nos ta keda mas enfoca na lealtad na e partido cu nos ta parti di dje, sin considera si e partido ta realmente atende e desafionan cu nos ta enfrenta. Ta un pueblo nos ta y mester sa di biba y comparti cu otro.

Duna lealtad

Pa logra e cambio cu nos ta busca, pueblo tin cu duna un oportunidad na e partido chikito cu a goberna y ta den parlamento, e chance pa bini back y asina ‘ki siña di erornan, haci cambio y crece den un forsa nobo. Na lugar di simplemente move pa un partido nobo prometedor cu mayoria biaha no tin experiencia, un circulo vicioso cu no ta trece cambio pero simplemente hiba nos “back to square one” sin nunca por bira un forsa di representacion real. E votador mester duna partidonan aki un segundo oportunidad pa crea consistencia y un base solido pa crecemento. Consistencia a largo plaso lo por produci e deseo di e grupo Arubano cu no ta sinti cu nan ta wordo representa y tampoco nan necesidadnan atendi cune.

Duna e lealtad cu otronan a duna na nan partido desde nan establecimento y cu awe ta considera nan e partidonan grandi/tradicional ta un practica digno di replica.

Sistema di tres partido

Introduccion di un tercer partido cu poder por duna e balansa y diversidad necesario cu lo permiti un sistema politico mas stabiel y sano cu un base di representacion den gobernacion mas amplio. Un sistema di tres partido por incentiva mas debate, mehora transparencia, y produci mas dunamento di cuenta den gobernacion.

Pa construi un tercer partido “grandi”, nos por crea un alternativa cu ta ofrece politica y perspectiva cu por beneficia mas hende cu e coalicion nan cu nos a conoce ultimo tempo entre un partido “Grandi y uno “Chikito”. Paisnan manera Canada y Alemania a utilisa efectivamente  e “multi-party system” cu a facilita negociacion y creacion di coalicion, permitiendo un representacion mas inclusivo di e poblacion.

Por ultimo, nos mester pidi e electorado(votador) pa wak mas leu cu e eleccion aki y cambia di e custumber di simplemente “switch” entre partidonan chikito en busca di e partido perfecto na lugar di esaki, considera sostene un partido cu tin potencial pa siña, coregi su erornan cometi y crece a largo plaso. Sostene e partido ey pa mas cu un eleccion y asina di berdad subi e posibilidad pa crea un impacto significativo. Invertiendo den e proximo partido “grandi”, nos por kibra e ciclo di desilusion y pusha un cambio den politica Arubano berdadero. E cambio cu lo beneficia e pueblo den gobernacion mas eficiente y eficaz. Ban copia e custumber politico positivo cu a hiba paisnan manera Canada na progreso significativo. Ban duna “trias politca” un segundo definicion: Tres partido politico “Grandi” en bes di dos.