Segun e medio internacional Reuters, e compania nacional Colombiano di petroleo, Ecopetrol, ta bay construi un planta nobo di produccion di hidrogeno na su refineria na Cartagena de Indias, na costa di Caribe. E suma cu lo inverti US$28.5 miyon, segun declaracion di Ecopetrol haci dia 2 di december ultimo. E planta lo produci 800 ton (800.000 kilo) di hidrogeno anualmente, y di e manera aki lo bira e productor mas grandi di hidrogeno na America Latino.

Cu esaki, Ecopetrol ta duna oido tambe na maneho di presidente Gustavo Petro, di deshaci pa gran parti di uso di combustible fosil y reemplaza esaki cu energia renovable. Ecopetrol, e compania mas grandi di e pais, a anuncia tambe plan pa participa den un destaho pa proyecto di energia di biento for di costa.

Proyecto Colombiano vs proyecto na Aruba

Den un analisis di desaroyo di proyecto di hidrogeno den region di Caribe, di 16 maart 2023, Bon Dia Aruba a dedica atencion na e proyecto piloto di e compania Promigas, na Cartagena tambe, cu lo a cuminza cu un ‘electrolyser’, un parque solar di 137-MW y awa di tubo di Cartagena su sistema, pa produci hidrogeno berde pa inyecta den e red di gas natural. E compania a bisa di kier yega na produci alrededor di 1.574 kilo di hidrogeno anualmente. E planta piloto tabata diseña pa aumenta den cinco fase, cu lo duna un produccion di te 15 ton di hidrogeno pa aña, dependiendo di condicion y incentivo di regulacion y di mercado pa hidrogeno berde, segun Promigas aña pasa.

Segun e analisis di Bon Dia, Energy Analytics Institute (EAI) a calcula cu Colombia tin e potencial di explota entre 1 GW y 3 GW di electrolyser a mediano plazo, segun e plan nacional pa hidrogeno. Na Aruba e proyecto di energia di biento pa usa pa produci hidrogeno lo ta menos cu e produccion total di energia electrico, cu ta algo mas di 100 MW, un volumen di produccion hopi mas chikito di loke ta proyecta di desaroya na Colombia. Na 2021 gobierno Colombiano a cuminza pone inversion den hidrogeno berde, ofreciendo beneficio di impuesto y otro incentivo mas pa stimula iniciativa igual na categoria di energia renovable no-convencional, haciendo acceso na beneficio di impuesto y otro incentivo mas facil.E plan di Ecopetrol ta parce di ta cumpli cu e obhetivo di haco uso di e incentivonan y lo ta di un nivel mas halto ainda, cu e produccion di 800 ton pa aña. Ecopetrol cu e plannan aki lo bira e productor mayor na America Latino, cu mihor perspectiva tambe pa exportacion, en vista di e escala mayor di produccion cu lo brinda un prijs mas conveniente. Esaki lo por tin como consecuencia cu e produccion limita na Aruba, di menos di mil kilo, dificilmente por yega na un prijs competitivo, loke ta haci eventual exportacion di hidrogeno practicamenteun ilusion. Di otro banda, hidrogeno pa uso na WEB lo ta como ‘backup fuel’ solamente. E proceso caro di hidrogeno, a base di energia di biento y solar, no por ser usa pa produccion regular di coriente, pasobra lo ta mas conveniente di usa e energia berde ey directamente den e red di distribucion, envez di produci hidrogeno.