(AP) — Oficialnan Palestino ta bisa cu Fatah y Hamas ta cerca di un acuerdo pa nombra un comite di tecnocrata politicamente independiente pa administra Gaza Strip despues di e guera. Efectivamente e lo caba cu gobierno di Hamas y lo por yuda avansa negociacion pa stop bringamento cu Israel.
E fraccionnan rival a haci varios intento fracasa pa reconcilia desde cu Hamas a tuma poder na Gaza na 2007. Mientras tanto, Israel a descarta cualkier rol na Gaza despues di e guera ni pa Hamas ni pa Fatah, cu ta domina e Autoridad Palestino cu sosten occidental.
Un oficial di Autoridad Palestino ayera a confirma cu a yega na un acuerdo preliminar despues di simannan di negociacion na Cairo. E oficial a bisa cu e comite lo tin 12 pa 15 miembro, mayoria di nan di Gaza.
E lo reporta na Autoridad Palestino, cu tin su sede den e West Bank ocupa pa Israel, y traha cu partidonan local y internacional pa facilita asistencia humanitario y reconstruccion.
Un oficial di Hamas a bisa cu Hamas y Fatah a acorda e terminonan general pero ainda tabata negociando algun detaye y e individuonan cu lo sirbi den e comite. E oficial a bisa cu lo anuncia un acuerdo despues di un reunion di tur fraccion Palestino na Cairo, sin duna un fecha.
Prome minister Israeli, Benjamin Netanyahu a priminti di continua e guera te cu desmantela Hamas y un multitud di rehen keda libera. E ta bisa cu Israel ta bay mantene control di seguridad riba Gaza, cu asuntonan civil administra pa Palestinonan local sin afiliacion cu Autoridad Palestino of Hamas.
Ningun Palestino a boluntaria publicamente pa un rol asina, y Hamas a menasa cualkier persona cu coopera cu ehercito Israeli.
E oficial di Hamas a bisa cu e acuerdo Palestino emergente lo cumpli cu un di e metanan di guera di Israel door di caba e gobierno di Hamas na Gaza. No ta cla si oficialnan Israeli lo mir’e asina.
