Despues di 10 siman di les riba tur diamars, a clausura e curso di “Capacity Building Training” cu a ser organisa door di e Direccion di Desaroyo di Comite Olimpico Arubano bou di guia di Sr. Patrick Werleman y Anastasia van Daal.
E curso aki a wordo prepara specialmente pa capacita e dirigentenan di nos federacionnan nacional, unda a elabora riba 7 tema importante pa tur aspecto di maneho di un federacion, unda a enfoca riba tayernan manera bon gobernacion, finanzas, marketing y mucho mas.
Pa clausura e curso aki a hasi un anochi di clausura, unda cu e entre otro a gradici tur orador cu a participa boluntariamente durante e 10 simannan aki, ofreciendo nan tempo y experticio, ademas di felicita tur dirigente deportivo cu a participa, otorgando un certificado di participacion. Comite Olimpico Arubano ta felicita tur esnan cu a participa den e curso aki y ta conta cu e uso di e conocemento aki pa asina eleva e nivel di nan federacion nacional.
