Den un entrevista recien cu minister demisionario di Transporte, Integridad, Naturalesa y Asuntonan di Adulto Mayor, y lider di partido RAIZ Ursell Arends Bon Dia Aruba a puntra e mandatario tocante e cierre di dump, topico di taxista y tambe kico ta RAIZ su pernsamento tocante partidonan cu ta campaña riba aumento di pensioen.

Varios partido politico a inclui den nan programa di partido cu nan lo aumenta pensioen of baha edad di pensioen. Bon Dia Aruba a puntra minister Arends kico ta RAIZ su pensamento tocante esaki. “Bo no por campaña cu promesanan falso, djis pa por gana voto,” el a remarca.

El a splica cu loke RAIZ a bin ta haci ta traha structuralmente pa garantisa un bon calidad di bida y un bon calidad di cuido pa adultonan mayor. El a resalta cu nan a logra adelantonan grandi den e area aki y cu den e gabinete aki nan a crea e fundeshi stabiel pa por sigui construi riba esaki.

El a menciona cu nan a introduci pasadia y actualmente tin cinco pasadia activo caminda e adultonan mayor por bay di mainta te atardi pa socialisa. Ademas tin actividadnan organisa pa mantene e adultonan mayor activo, manera por ehempel music therapie. E mandatario a señala cu nunca antes den e historia di Aruba tabatin un ministerio dedica na adultonan mayor ni tampoco un directie cu ta atende solamente cu e interesnan di e adultonan mayor.

El a destaca cu nan a trece trankilidad na SABA, a aloca e fondonan necesario, no solamente pa e adultonan mayor, pero tambe pa e debe cu tabatin cu e trahadonan y a regla e aspectonan aki. “Nos a trece tur hende den e veld hunto pa traha riba un solo liña con nos ta bay sirbi e interesnan di nos adulto mayor a traves di e FAM, Forum Adulto Mayor,” el a indica.

Pa loke ta trata aumento pensioen of redobla pensioen, minister Arends a splica cu tin estudionan realisa caba cu ta mustra cu esaki no ta posibel. El a subraya cu loke si RAIZ ta priminti ta cumpli cu e compromiso cu nan tin cu e adultonan mayor y henter comunidad ta pa debolbe e dignidad economico back na tur ciudadano.

El a sigui splica cu Aruba tin suficiente entrada pa paga pa su gastonan di operacion. El a resalta cu na 2024 tin un surplus di 2.2% cu ta representa 166.6 miyon florin di surplus di cual 1% ta e obligacion cu tin cu Hulanda, cu ta representa 74.4 miyon florin. E resto, el a indica, gobierno mester debolbe back na comunidad y laga e ciudadanonan dicidi con nan ta haci uso di esaki. “No ta e tarea di gobierno pa ranca placa for di sector priva y ranca placa for di ciudadanonan y despues como gobierno abo ta scoge na kico bo ta duna back y con bo ta duna back. Esey no ta un tarea di gobierno,” el a enfatisa.

Minster Arends a remarca cu den full comunidad, den tur sector, tin deficit y ta ora pa tur hende cuminsa realisa esey. El a indica na 2021 berdad gobierno tabata saliendo for di pandemia y mester a tuma decisionnan cu ta necesario, pero aworaki, el a destaca, temponan a cambia y decisionnan mester cambia tambe tocante con gobierno ta bay sirbi comunidad. “Aruba ta genera suficiente entrada cu nos hendenan por biba un bida digno. Nos no por sigui propaganda One Happy Island si bo hendenan no ta happy,” el a subraya.

Ya ta bay haci tres aña cu dump di Parkietenbos a cera oficialmente, pero ainda e decision aki ta ricibi critica. Bon Dia Aruba a puntra minister Arends kico e ta desea cu e criticonan por compronde tocante e decision pa cera dump.

El a splica cu primeramente e hendenan den e bario no por a sigui biba den e condicionnan cu nan tabata biba aden pa 70 aña caminda e muchanan no por a hunga pafo y ciudadanonan no por habri bentana ni porta di cas. Esaki, el a resalta, no ta condicionnan cu nan ta desea pa e ciudadanonan sigui biba aden y pa e motibo ey a atende cu e situacion aki inmediatamente.

El a sigui splica cu fuera di e impacto negativo riba salud di full vecindario, tambe mester reconoce e impacto negativo riba naturalesa y con full e area a ser destrosa tanto riba tera y den lama. Ademas, el a indica, esaki tabata tambe e prome impresion cu tur turista cu ta baha cu avion ta wak di Aruba, e huma preto y ta ultimo impresion cu nan tabata bay cun’e ora nan bandona e isla. “E cos aki no por a sigui asina mas. Nos ta un pais civilisa y desaroya y nos no por a permiti esaki continua,” el a enfatisa.

Minister Arends a indica cu a cuminsa na realoca desperdicio y hiba nan na companianan cu por procesa esaki den materia prima cu por ser usa localmente of cu por ser exporta. El a resalta cu no tur cos ta soluciona ainda, pero ta den e bon caminda si. El a remarca cu den e proximo gabinete loke nan lo haci ta introduci un parke circular caminda 22 tipo di desperdicio ser treci, separa y procesa debidamente y asina nada no mester se dera mas

El a splica cu aworaki nan ta den proceso di converti dump di Parkietenbos den un parke solar. El a indica cu e tareanan ta andando, ta construyendo un cura nobo. El a agrega cu e gunning pa e bidding pa loke ta trata e saneamento cu asbestos tambe a ser otorga caba y aworaki e ultimo bidding cu ta tumando luga ta pa sanea e dump completamente. “Una bes esaki ta cla mi ta kere e ta bira un atributo positivo pa henter e comunidad y pa henter e bario tambe mirando cu e ta wordo converti den un solar park cu ta bay genera coriente usando e solo. Di e forma aki e area di algo negativo ta bay contribui positivamente na e desaroyo di nos pais,” el a resalta.

Taxista – Loopholes

Mayoria di e vergunining semper ta wordo otorga prome cu eleccion. Desde 1986 esaki tabata e practica. Ningun di e vergunning aki ta hende cu ta canalisa un proceso, cu ta transparente y husto ye sey ta netamente loke mi a cuminsa cune. For di ministerio di transporte nos a cuminsa cu un proceso desde october 2023 caba pa anuncia cu ta bay tin un portal unda tur hende cu a yega di aplcia por reaplica y hasta e hulpchaufeurnan por aplica pa yega na nan propio vergunning. Door di haci uso di tecnologia, crea un portal cu ta transparente cu tur hende por aplica y wak na unda nan ta den e lista ora nan aplica. Mi ta kere esaki ta provee henter e comunidad di Aruba cu e transparencia necesario unda na por maletin e portal y mantene e sistema accountable, esaki ta netamente loke nos haci.

Pa loke ta e tema di taxistanan, den Parlamento di Aruba minister Arends a menciona cu el a cera loopholes cu tabata existi pa loke ta e proceso di otorgamento di permiso di taxi. Bon Dia Aruba a puntra e mandatario ki loopholes precisamente e tabata referi na dje.

El a splica cu e loopholes tabata cu semper e persona mester a depende di un politico pa e dun’e un fabor politico of fix un permiso. El a indica cu di e manera cu nan a organisa e otorgamento di permiso ya niun persona no ta depende di ningun minister ni di ningun hende pa fix e permiso. El a sigui splica cu aworaki e persona ta cana su caminda y si e ta den su derecho y e proceso ta husto e lo yega na su vergunning manera ley ta prescribi.

“Esey ta loke nos a cera. Tur e loopholes cu tabata contradeci un sistema husto y cu no ta duna oportunidad igual na tur ciudadano pa por yega na nan propio vergunning. Esaki ta e loopholes cu nos a elimina,” el a destaca.

Por ultimo, minister Arends a enfatisa cu den e proximo gabinete RAIZ lo sigui construi riba e fundeshi cu nan a crea caba, pero ta resalta cu ta importante den e periodo cu Aruba ta aden aworaki di eleccion pa tur votador como ciudadano reconoce cu tin hende cu ta priminti shelo y tera pero en realidad na no tin un plan pa con nan ta bay paga pa e cosnan aki. “Nos a mustra caba di ta cumpli y por haci un diferencia,” el a subraya.

“Ora bo vota dia 6 di december vota consciente. Dia 6 di december nos ta den un etapa crucial como pais. Bo voto ta bay dicidi e rumbo di nos pais y p’esey nos ta haci un yamado na tur e personanan aki pa haci uso di bo derecho di voto.