Plan politico bunita… Pero conta paga…?

Pasando den e programa y plannan di e partidonan político, ta dificil pa suprimi un sentimento di duda encuanto e factibilidad di gran parti di loke ta propone di diferente banda. E factibilidad ey nos por pone den diferente categoria, manera esun financieramente (in)alcanzable. Otro ta e categoria di asunto no alcanzable pasobra e mero ambiente y condicion den cual e mester tuma lugar ta asina negativo. Otro ta e categoria di asunto realizable, pero ta minimo den efecto riba e totalidad di nos economia, o cu un impacto minimo riba sociedad en general. Y ta bon pa tene na vista cu un programa di gobernacion di un partido politico den tempo di campaña no ta exactamente e lugar pa bin topa cu e aspectonan adverso o negativo cu ta haci e plan proponi menos probable. Pero pa resolve esey, mester tin prensa responsable y cu conocemento di e materia.Nos ta repasa algun caso cu ta cay den e categorianan menciona.

Tuma por ehemplo e keho general cu un pensionado actualmente no por biba di e AOV, talvez hasta reduci pa varios motibo, cu nan ta ricibiendo. E contesta politico, sigur den campaña, ta facil: ban aumenta pension drasticamente! Claro cu practicamente ningunno ta bay den e trasfondo di cifra real y realistico cu por indica e limitenan di tal accion. Y ora nos bay busca e cifranan cu por sustenta cualkier opinion, nos no ta haya loke nos mester. Sin embargo, nos ta traha cu loke tin. Ultimo cuenta anual di SVb (2022) ta indica cu nos banco di seguro social a cobra Afl. 297 miyon na prima di AOV. Esaki ta Afl. 25 miyon mas cu na 2021, mustrando e recuperacion economico cu Aruba ta experimentando. Aña 2023 a bay mihor ainda, y aunke nos no tin cifra concreto, nos por destila di cifra di cantidad di cupo di trabao di e propio SVb, cu na 2023 tabatin 2,5 mas cupo di trabao nobo registra cu na 2022. Motibo pa supone cu e aumento di entrada di prima AOV tabata sigur riba Afl. 50 miyon. Un similar crecemento den empleo na 2024 ta parce probable y e fondo ta den pleno recuperacion, cu e perspectiva di yega na reserva financiero considerable. Pero, aki tambe nos mester ta cauteloso. Nos a mira den pasado con e fondo di reserva aki, di mas di Afl. 300 miyon, den poco aña a desaparece completamente, unda e unico respuesta di e gobierno di e tempo ey tabata un desgana enorme pa tuma cualkier medida. No bisa anto cu nos no por haya nos den problema atrobe. Asina mes nos ta tende grito pa aumenta e pension cu 50%, por ehemplo. Ni siquiera ta tuma e molester pa splica pueblo unda nos ta awe, kico nos ta gasta anualmente na AOV. Ultimo cifra disponible di 2022 ta indica cu SVb a paga Afl. 264 miyon na AOV, sin tuma na cuenta e ‘reparatietoeslag’ cu Pais Aruba ta pasa pa SVb. Nos no por laga e desaroyo faborable na 2023 y 2024 gaña nospasobra tur institucion serio ta anticipa cu e crecemento economico lo cuminza ‘level out’ na 2025 y sigui asina despues. Ademas, nos lo haya un grupo mas grandi cu ta yega na edad di pension, pasobra na 2024 a termina e medida di retraso di 6 luna cada aña, pa yega na 65 aña. Awor, un pregunta simple: un reserva di maximamente algun cien miyon florin ta suficiente pa combati un aumento di 50%, cu ta hiba gasto anual na Afl. 400 miyon por lo menos, mas un reserva por si acaso algo grave pasa? Concretamente, nos no ta mes na tal nivel di entrada pa e fondo, incluyendo e añanan di relativo bonanza 2023-2024?Esaki nos mester?

Awor e categoria di plan no alcanzable pasobra mayoria di aspecto ta adverso. Por ehemplo, loke por tende di plan pa usa e tereno di refineria pa genera actividad economico prometedor. Si ta referi na actividad cu por reemplaza e actividad petrolero cu a termina mas di 12 aña pasa, lo mester ta anto actividad cu ta trece divisa pa e pais, es decir actividad cu ta por ehemplo exporta producto of servicio. Actividad cu no ta haci esaki, mas tanto ta biba riba custiya di e poder di compra local y loke un consumidor gasta na X, e no por gasta na Y. Di tur loke nos a observa te awor, tur ta cay den e categoria cu Hulandesnan lo yama ‘wel leuk’, nada mas. Crea un pilar economico ta algo otro cu inventa actividad economico na nivel primitivo y lamentablemente ta esey so nos ta mira.

Un di e sectornan cu nos por imagina por crece te un nivel respectable ta e produccion local di fruta y berdura fresco, cu e limitante cu nunca e por yega na sustitucion considerable di loke nos ta importa anualmente. Sin embargo, aki fuera di lanzamento di lema y consignapolitico,nos no ta mira un maneho coherente, incluyendo un plan di apoyo financiero adecuado. Cu e resultado cu despues di eleccion lo cay un silencio profundo atrobe pa cu e tema aki, y cada productor bay salba nan mes si por. Algo straño sucediendo aki? No, segun nos opinion, nada nobo. Esaki ta e maneho mancaron cu nos ta mirando pa decadas caba, unda e famoso ‘diversificacion’ economico ta pega riba: factor limitante real, ausencia di plan serio, y presentacion di plan segun ciclo di campaña, careciendo di apoyo gubernamental serio. Te ey nos a yega…