Desde cu oproepingskaartnan a cuminsa yega na adres di votadornan rond Aruba, riba rednan social varios persona ta publica cu nan a ricibi oproepingskaart di personanan cu no ta biba na nan adres. Den algun caso e personanan a ricibi hasta mas cu un oproepingskaart ekiboca. Bon Dia Aruba a tuma contacto cu Sharine Luidens pa puntra tocante e situacion aki.
Riba rednan social den e ultimo siman aki varios ciudadano a publica riba Facebook cu nan a ricibi oproepingskaart di personanan cu no ta registra na nan adres y ta busca informacion pa sa kico pa haci den e caso aki of ta busca contacto cu e persona cu su informacion ta para riba e oproepingskaart.
Reportera di Bon Dia Aruba a tuma contacto cu sra. Luidens pa puntra kico ta e motibonan cu ta manda oproepingskaart na adres robes y kico e ciudadano cu haya e carchi cu no ta di dje mester haci den e caso ey.
Luidens a splica den su contesta cu ya caba Censo a yega di informa cu oproepingskaartnan ta yega na e adres cu e hende ta registra na dje. El a remarca cu ta keda na responsabilidad di e ciudadano pa ta registra unda e ta biba.
Riba rednan social tambe por a tuma nota cu hopi persona no a haya nan oproepingskaart na nan adres tampoco. Den e caso aki e personanan cu no a haya nan oproepingskaart prome cu dia 29 di november mester a presenta na Censo pa busca nan oproepingskaart.
Varios ciudadanonan tambe a publica riba Facebook cu nan a haya oproepingskaart kibra of daña. Conseho Electoral di Aruba a informa mediante un anuncio cu pa personanan cu a haya na carchi di voto daña di tal forma cu e informacion no ta visibel mas, por pasa personalmente cu un identificacion valido pa busca un duplicado na oficina principal di Censo. Por haci esaki entre 29 di november y 5 di december di 4or di atardi pa 6:30 di atardi.
Potretnan: Facebook
