(AP) – Un emprendedor di criptomoneda cu a cumpra un arte cu ta consisti di un simpel banana pega cu duct-tape na un muraya pa 6.2 miyon dollar siman pasa a come e fruta na Hong Kong diabierna.
Justin Sun, naci na China, a kita e tape for di e fruta y a come esaki durante un conferencia di prensa na The Peninsula Hong Kong, un di e hotelnan mas caro di e ciudad, den e districto popular Tsim Sha Tsui.
“E ta smaak mas miho cu otro banananan. Berdaderamente, basta bon,” el a bisa.
“Comediante,” di e artista Italiano Maurizio Cattelan, tabata un fenomeno ora cu el a debuta den 2019 na Art Basel Miami Beach, mientras cu esnan cu a bay e festival tabata purba saca afo si e fruta pega na e muraya tabata un simple chiste of un comentario riba e standardnan cuestionabel di esnan cu ta colecta arte. A yega un punto unda un otro artista a kita e banana for di e muraya y a come esaki.
E arte a atrae asina hopi atencion cu mester a kit’e for di bista. Sinembargo 3 edicion a bende pa entre 120,000 te cu 150,000 dollar, segun e galeria cu ta trata e bentanan na e tempo aki.
Siman pasa, Sun, fundador di e plataforma di criptomoneda TRON, a haci e apuesta ganador na Sotheby’s Auction na New York. Of, di manera mas corecto, Sun a cumpra e certificado di autenticidad cu ta duna su persona e autoridad di e banana aki y yam’e “Comedian.”
Na e tempo aki, Sun a bisa den un declaracion cu e arte ta “representa un fenomeno cultural cu ta uni e mundo di arte, meme y e comunidad di criptomoneda.”
“Mi lo personalmente come e banana como parti di e experiencia artistico unico. Honrando su posicion den ambos historia di arte y cultura popular,” el a comenta.
