Recientemente Oficina Central di Estadistica (CBS) a publica e resultadonan principal di e Indice di Prijs di Consumo (CPI) pa luna di october 2024.

E resultadonan ta mustra cu pa luna di october 2024 e CPI ta 109.19, loke ta representa un caida di 0.4% compara cu e indice di e luna anterior, september 2024 cual tabata 109.58. Pa loke ta e cambio di e CPI pa e ultimo 12 luna, october 2023 te cu october 2024, esaki ta 1.0%, cual ta representa un caida di 0.7 punto di porcentahe compara cu e periodo corespondiente di aña pasa cual tabata 1.7%.

E resultado di e promedio anual, ultimo 24 luna (dos aña), di e tasa di inflacion pa e periodonan di october 2021 te cu october 2022, y october 2023 te cu october 2024 ta 2.0%. Esaki ta representa un caida di 2.1 punto di porcentahe compara cu e 4.1% cu a ser registra den e periodonan di october 2020 te cu october 2021 y october 2022 te cu october 2023.

Pa loke ta e luna di october specificamente, e resultadonan ta mustra cu seis di e diesdos sector a registra un caida di prijs. E caidanan cu tabatin e mayor efecto riba e CPI a ser registra pa e sectornan di transporte (-2.4%) y vivienda (-0.3%), causando un efecto di respectivamente, -0.32 y -0.08 punto di porcentahe. E caidanan den e sectornan restante a contribui cu un efecto di -0.06 punto di porcentahe riba e CPI di October 2024.

CBS a indica cu e caidanan aki a ser contraresta parcialmente door di principalmente un aumento den e indice di e sector di paña y sapato (2.2%) cu a contribui cu un efecto di 0.05 punto di porcentahe riba e CPI di october 2024. E aumentonan den e sectornan restante a contribui cu un efecto di 0.05 punto di porcentahe riba e CPI di October 2024.

Pa loke ta e caida den e sector di transporte, CBS a splica cu esaki a ser causa principalmente door di un caida di 3.8% den e categoria gasto relaciona cu uso di vehiculo di transporte personal, causando un efecto di -0.31 punto di porcentahe. E caida den e sector di vivienda a ser causa door di un caida di 1.5% den e categoria “mantencion y reparacion di vivienda”, causando un efecto di -0.09 punto di porcentahe. E aumento den e sector di “paña y sapato” a ser causa door di un subida den e categoria paña (2.9%), causando un efecto di 0.05 punto di porcentahe.

Pa loke ta trata e canasta di consumo di CPI, esaki ta consisti di 408 bienes y servicionan. Compara cu september 2024, 41.4% di e bienes y servicionan aki a conoce un aumento di prijs causando un efecto di 0.50 punto di porcentahe, mientras cu 38.2% ta mustra un caida di prijs, cu a contribui cu un efecto di -0.86 punto di porcentahe y pa e restante 20.3% no tabata

tin cambio den prijs.

E resultadonan a indica tambe cu prijsnan di bienes a baha cu 0.6% y a causa un efecto di

-0.35 punto di porcentahe. Segun CBS prijsnan di servicionan practicamente no a cambia compara cu luna anterior, september 2024, y a causa un efecto insignificante riba e CPI di october 2024.