El Salvador: Senadornan Mericano ta critica “violencia estatal” di gobierno di Bukele

(PrensaLibre) – Comite di Relacion Exterior di Senado Mericano a critica gobierno Salvadoreño di Nayib Bukele pa “crea un narativa falso riba custia di democracia y derechonan humano.”

Diamars atardi, senadornan Mericano Ben Cardin y Tim Kaine, como miembro di Comite di Relacion Exterior di Senado pa hemisferio occidental, a emiti un declaracion contra e estado di excepcion di presidente Bukele.

Segun e senadornan, un estado di excepcion ta sirbi pa aborda “situacionnan di emergencia y mester ta temporal.” Sinembargo, e mandatario Salvadoreño a goberna e pais Centro Americano bao e regimen aki desde maart di 2022, loke ta 32 luna di “violencia estatal” cu detencion masivo na e teritorio.

Segun Cardin y Kane, violencia estatal no ta e solucion pa un seguridad duradero, pa loke e decision di El Salvador di aproba otro luna pa estado di excepcion ta un violacion di derechonan civil, ya cu ta “permiti aresto masivo sin evidencia y ta socava gravemente e integridad di sistema hudicial Salvadoreño.”

Estado di excepcion na El Salvador a desaroya originalmente pa aborda violencia di gang, sinembargo, Bukele a dicidi dun’e un caracter “permanente y indefini” pa poder ehecutivo por usa e forsanan di seguridad di estado y implementa un politica di represion.

Segun e presidente di e Comite, “miles di Salvadoreño a keda aresta arbitrariamente sin debido proceso (…) y sin conocemento di e cargo den nan contra.” El a agrega cu “a pesar cu tasa di homicidio na El Salvador a disminui durante e periodo aki, miles di Salvadoreño a muri den custodia estatal y hopi mas a sufri tortura of a keda desapareci pa gobierno di Nayib Bukele.”

E senadornan a indica cu administracion di Bukele mester restaura orden constitucional pa pueblo di su pais, pone fin na su practica di huicio masivo, duna asesoramento legal na e detenidonan y duna sosten pa reintegracion di Salvadoreñonan inocente lastra inhustamente pa represion.

Finalmente, e denunciantenan a sigura cu e estado di excepcion a fomenta falta di transparencia y dunamento di cuenta tocante e maneho di recurso publico, pasobra e regimen a elimina controlnan legal riba e procesonan administrativo pa contratacionnan di estado y derecho na acceso di informacion publico.