Recientemente, Minister demisionario di Husticia y Asuntonan Social, Sr. Rocco Tjon (MEP), tabata na departamento di DIMAS pa lansamento di e proyecto nobo di “Self Payment Kiosk,” caminda ta digitalisa procesonan pa mitiga cu erornan por wordo cometi y alabes mehora e servicio cu ta brinda na clientenan.
Segun un comunicado di gobierno, a introduci e proyecto aki, mirando cu e ta importante pa como gobierno y como un departamento gubernamental esta DIMAS, e servicio cu ta brinda ta uno bon. Na final di dia, ora bo brinda un bon servicio, e ta bira menos posibel pa como organisacion bo ta suceptibel pa corupcion.
E proyecto aki ta e prome fase, y lo sigui amplia pa asina mas tanto posibel procesonan por keda digitalisa, y di e forma ey ta brinda, no solamente un miho servicio, pero e chens cu erornan ta ser cometi tambe ta bira menos.
Otro siman lo tin un ekipo di Hulanda na Aruba, y hunto cu e leiding di DIMAS lo bay haci un auditoria di henter e organisacion, pa asina percura cu tur procesonan por ta eficiente y di e forma ey por sigui mehora e servicio cu ta brinda na henter nos comunidad.
