Recientemente, Bon Dia Aruba a combersa cu lider di partido Curpa, Eric Ras, pa discuti e ideanan fundamental di su partido y e plannan cu tin pa Aruba.

A lanta partido Curpa na 2009, 15 aña pasa. Bon Dia Aruba a puntra kico Ras ta pensa ta e motibo cu den e decada aki Curpa no a logra saca un asiento. “Mi ta kere e mensahe na prome lugar no a yega. Ami a drenta partido Curpa na 2017, nos a hiba un campaña di tres luna, pero no tabata suficiente. Na 2021, mi a bira lider. Den un luna ta imposible pa bo por logra. Esey mi ta kere tabata e motibo pakico nos no a yega na e votadornan pa nan por conoce nos programa di gobernacion. Si nan no sa cu bo ta existi, ta hopi dificil cu un hende ta vota pa bo.”

Sinembargo, pa e biaha aki Ras ta mas optimista, pasobra nan tabatin tres aña publicando articulo pa pueblo por conoce mas un tiki mas di nan partido. “Mi ta kere cu e biaha aki si e mensahe ta yegando. E feedback cu nos ta hayando ta duna nos un satisfaccion.”

Contestando si Ras ta kere cu tin un deseo den pueblo pa e tipo di proposicion cu Curpa ta treciendo dilanti, el a bisa cu nan “a mira cu tin un acogida.” Un di e puntonan mas importante ta un riba cual e partido a basa su lema, “principio, norma y balornan.”
“Pueblo no ta confia politiconan mas pa via cu tin hopi gañamento den campaña, anto esey ta haci cu hendenan ta demotiva, of nan no tin e confiansa den e partidonan politico.”

Ras ta bisa cu den ultimo tempo por mira un cambio den e manera cu pueblo ta expresa sosten pa politico. Por ehemplo, compara cu pasado, e aña aki no ta mira mucho auto cu bandera y sticker di partido. “Mi ta kere cu e biaha aki ta bay tin un sorpresa dia 6 di december.”

“Si bo no ta di acuerdo cu mi, esey no kiermen mi no por traha pa bo”

Partido Curpa ta para pa balornan Cristian, sinembargo, na Aruba tin diferente cultura y religion. Ras ta sigura cu Curpa lo respeta derecho y lo goberna pa tur hende igual. “Den nos gobernacion, unico cos cu mi lo bisa ta cu leynan di Dios no ta negociable. Pero si nos traha, nos tin di traha pa tur hende. Si bo no ta di acuerdo cu mi, esey no kiermen cu mi no por traha pa bo. Nos tin di brinda tur hende nan mesun derecho, nan derecho cu nan tin bo no por bay kita nan, y nos tin cu respeta esey.”

Tocante si nan posicion ideologico lo trece dificultad pa traha cu otro partido, Ras a bisa: “E no ta facil, pero mi ta kere ora bo negocia, bo tin cu negocia principionan, y mantene bo mes na principio y palabracionnan haci, pasobra esey ta importante. Nos t’ey pa mira cosnan wordo concretisa den un termino cortico. Aruba mester di un cambio aworakinan.”

Permiti dokter studia na Colombia traha na Aruba

Durante debatenan politico, partido Curpa a menciona turismo medico como un industria cu lo kier explora. Pero tin critica cu infrastructura medico di Aruba no ta adecuado pa esaki y alabes tin un escasez di profesional di salud. Ras a bisa cu por desaroya ImSan y trece specialista eynan temporalmente pa alivia e falta di profesional medico. “BIG ta strobando desaroyo di dokter na Aruba. Por ehemplo, un hende cu a studia na Colombia, ora e bin akinan e no por traha, e mester bay specialisa [pa cumpli cu rekisitonan di BIG], anto e ora e por traha. Pero mientras tanto, nos ta mandando hopi di nos hendenan pa Colombia pa ricibi tratamento medico. Anto esey nos tin cu bay pone den balansa.” Ras ta propone un maneho cu ta permiti dokter studia na Colombia bin Aruba pa traha a termino corto, asina hende por haya tratamento.

SDGs “no ta trece bienestar pa niun hende”

Partido Curpa tambe a enfatisa nan rechaso contra implementacion di Metanan di Desaroyo Sostenible di Nacionnan Uni, e SDGs. Ras a splica cu “e ta un plan bunita, pero si bo wak tras di cortina, e no ta bunita, e ta net lo contrario.”

Ras ta bisa cu si ta mira tur lugar unda a implementa e SDGs, “e no a trece bienestar pa niun hende. Esaki ta pakico paisnan manera Suecia, El Salvador y Argentina a bisa nan no kier tin nad’i haci mas cu e plan aki. Kiermen paisnan ta bandonando e Sustainable Development Goals. E ta un plan caminda cu pueblo lo bay perde su derecho, y nan ta bay controla bo completamente.”

Ras a menciona ehemplo moneda digital, y smart cities como vincula na SDGs. “Nos no ta bay tin cuminda saludable mas pasobra nan ta bin cu carni sintetico. Nan ta bisa pueblo ‘prepara pasobra aki un par di aña bo tin cu bay come insecto’. Den e direccion ey nos ta bay.”

“Otro cos cu ta banda di dje ta Foro Economico Mundial (WEF). Kico Foro Economico Mundial ta bisa? Lo bo no tin nada y lo bo ta contento. Nos kier esey? Esaki ta loke pueblo kier? E cosnan aki dia pa dia ta bay bira pio si nos no par’e.” El a enfatisa cu “esey ta unda nos ta bayendo: libertad di hende ta bay perdi.”

Segun Ras, maske e posicion anti-SDG por trece conflicto den Reino, tin ehemplo di otro paisnan manera Italia, Polonia y Hungria cu ta cambiando y parando fuerte contra SDG. Ras ta mira cu e tendencia na Hulanda tambe ta bayendo den e direccion aki, y “esey ta bay ta e solucion pa Aruba.”
“Eynan ta unda nos ta bay haya e forsa pa trece e cambio aki back,” Ras a bisa, y a clarifica cu e “cambio” ta di un politica iskierdista pa uno derechista.

Mientras cu Ras ta di acuerdo cu algun di e ponencianan di Hulanda pa Aruba, manera landspakket y Reino, e ta adverti cu no mester entrega tur autonomia na Hulanda. “Nos sa cu akinan no a sa di maneha e pais.” E ta considera importante pa gobierno nobo entrante cuminsa na baha debe di e pais, pasobra ora cu por mustra Hulanda cu tin bon maneho, e ora nan no por punta dede. Pero no ta haciendo trabao manera mester ta.

“No ta tur hende ta yega edad pa baha cu pensioen”

Ras ta contra aumenta edad di pensioen, bisando cu no tur hende ta yega na edad di 65 aña pa retira. “Si mi bay den Cuerpo Policial, en dos aña siete polis a muri sin yega edad di pensioen.” E ta bisa cu por hisa e premie, y permiti pa esnan cu kier sigui traha. “Pero banda di esey mester diversifica nos economia pa Aruba haya mas entrada.” Asina por subsidia fondo di pensioen pa esnan cu mester y kier baha cu pensioen.

E motibo pakico no a logra diversifica economia te awo, segun Ras, ta pasobra “mas bien no tabatin boluntad.” El a menciona cu tempo cu Aruba a haya Status Aparte, a bisa cu Aruba lo por depende di pesca, pero no a desaroya e industria aki. “Wel ban cuminsa cu eseynan.” Ademas, ta sugeri pa duna incentivo na negoshi chikito, por ehemplo un excencion di impuesto di dos aña pa laga nan crece y produci y exporta. E ta sugeri remedinan di tera, of pica di Papaya. Un industria reforsa pa hopi negoshi chikito lo ta mas fuerte, e ta enfatisa.

Finalisando, Ras ta urgi pa bay back na norma y balor. “Nos a perde tempo pasobra tin protocolnan firma cu mester a ehecuta, pero ni firma gobierno no ta ehecuta. Ban back na nos standard. Ban back respeta otro. Ban traha pa adelanto di Aruba. Aruba ta di nos tur, Aruba no ta di ningun politico. Ora cu pueblo sinti cu e poder ta back den nan man, nan ta bay produci mas.”